پرانے معاملے میں ترنمول کانگریس کے کونسلر کو گرفتار کر لیا گیا

ہوگلی ضلع کی ڈان کونی میونسپلٹی کے وارڈ نمبر ۱۸ سے ترنمول کانگریس کے کونسلر سوریا دے کو پولیس نے مار پیٹ کے ایک پرانے معاملے میں گرفتار کر لیا ہے۔ ان پر ۲۸ مئی ۲۰۲۵ کو ایک شخص پر بہیمانہ تشدد کرنے کا الزام ہے۔ متاثرہ شخص کی شکایت کی بنیاد پر گزشتہ رات ڈان کونی تھانے کی پولیس نے کارروائی کرتے ہوئے ملزم کونسلر کو دھر دبوچا، جنہیں آج سری رام پور عدالت میں پیش کیا جائے گا۔کونسلر سوریا دے کا نام اس وقت پورے ملک اور ریاست کی سرخیوں میں آیا تھا جب الیکشن کمیشن کی جانب سے 'ایس آئی آر' کے عمل کے دوران انہیں سرکاری دستاویزات میں 'مردہ' قرار دے دیا گیا تھا۔ الیکشن کمیشن نے ووٹر لسٹ کی ابتدائی نظرثانی کے دوران کونسلر سوریا دے کا نام مردہ اور منتقل شدہ ووٹرز کی فہرست میں ڈال دیا تھا۔ اس بات سے ناراض ہو کر وہ اپنے حامیوں کے ساتھ سیدھے شمشان گھاٹ پہنچ گئے اور وہاں سے الیکشن کمیشن کے افسران کو پیغام بھیجا کہ اب وہ ان کی آخری رسومات (سنسکار) کا انتظام بھی خود ہی کریں۔ اس واقعے کے بعد، ترنمول کانگریس کے آل انڈیا جنرل سکریٹری ابھیشیک بنرجی ایسے تمام 'زندہ ووٹرز جنہیں کاغذات میں مردہ دکھایا گیا تھا' کو لے کر دہلی میں الیکشن کمیشن کے مرکزی دفتر پہنچے تھے، جس میں کونسلر سوریا دے بھی شامل تھے۔ بعد میں الیکشن کمیشن نے اس غلطی کو سدھارا اور ان کا نام دوبارہ ووٹر لسٹ میں شامل کیا گیا۔اگرچہ ماضی میں وہ الیکشن کمیشن کی غلطی کے خلاف احتجاج کی وجہ سے ہیرو بن کر ابھرے تھے، لیکن اب ایک عام شہری پر تشدد اور مار پیٹ کرنے کے مجرمانہ کیس میں قانون کے شکنجے میں آ چکے ہیں۔کاغذی کارروائی میں 'مردہ' ثابت ہونے کے بعد انوکھے انداز میں شمشان یاترا نکال کر سرخیوں میں آنے والے ٹی ایم سی کونسلر سوریا دے اب مار پیٹ کے سنگین الزامات کے تحت پولیس کی حراست میں ہیں، جس کے باعث ان کی سیاسی مشکلات میں اضافہ ہوتا دکھائی دے رہا ہے۔

Source: PC-sangbadpratidin