پلاسٹک کی خالی بولتوں کے نیچے سے گانجہ بر آمد

آم ڈانگہ : سڑک پر پولیس گاڑیوں کی تلاشی لے رہی تھی کہ اچانک ایک انجن وین کو روکا گیا۔ اس انجن وین میں پلاسٹک کی خالی بوتلیں بھری ہوئی تھیں۔ بظاہر ان میں کیا ملنے والا تھا؟ لیکن جب پولیس نے تلاشی شروع کی تو ان کی آنکھیں کھلی کی کھلی رہ گئیں۔ پلاسٹک کی خالی بوتلوں کے نیچے سے گانجے کی بوریوں کی بوریاں برآمد ہوئیں۔ یہ واقعہ شمالی 24 پرگنہ کے آمدانگہ کا ہے، جہاں سے 20 لاکھ روپے مالیت کا گانجہ برآمد کر کے راجستھان کے ایک شخص کو گرفتار کر لیا گیا ہے۔ گانجہ اسمگلنگ کے لیے اسمگلروں کے نت نئے ہتھکنڈوں کے بارے میں اکثر سنا جاتا ہے، لیکن اس بار اسمگلر نے جو منصوبہ بنایا تھا اس نے پولیس کو بھی حیران کر دیا۔ تاہم، آمدانگہ تھانے کی پولیس نے اسمگلنگ کی اس انوکھی کوشش کو ناکام بنا دیا۔ خفیہ اطلاع ملنے پر کل دیر رات نیشنل ہائی وے 12 پر آمدانگہ کے پرانے رجسٹری آفس کے قریب پولیس نے تلاشی مہم شروع کی۔ افسران نے ایک انجن وین کو روکا۔ جب ڈرائیور سے پوچھا گیا کہ وین میں کیا ہے، تو اس نے بڑی بے نیازی سے جواب دیا کہ اس میں صرف پلاسٹک کی خالی بوتلیں ہیں۔ بظاہر نظر بھی یہی آ رہا تھا، اور ڈرائیور نے تلاشی پر کوئی اعتراض بھی نہیں کیا۔اس کے بعد پولیس اہلکاروں نے گاڑی سے پلاسٹک کی خالی بوتلیں اتارنا شروع کیں۔ تبھی ان کی نظر نیچے رکھی گئی کئی بوریوں پر پڑی۔ ان بوریوں کے اندر گانجہ چھپایا گیا تھا۔ پولیس ذرائع کے مطابق، برآمد شدہ گانجے کی مقدار تقریباً 200 کلوگرام ہے، جس کی موجودہ مارکیٹ ویلیو تقریباً 20 لاکھ روپے بتائی جا رہی ہے۔پولیس نے انجن وین کے ڈرائیور کو گرفتار کر لیا ہے، جس کی شناخت شیخ فرید کے نام سے ہوئی ہے۔ 42 سالہ فرید کا تعلق راجستھان سے ہے۔ پولیس کا اندازہ ہے کہ شیخ فرید کے علاوہ اس اسمگلنگ گروہ میں مزید کئی لوگ شامل ہو سکتے ہیں۔ پولیس نے بتایا کہ گرفتار ملزم کو ریمانڈ پر لے کر گروہ کے دیگر ارکان کا سراغ لگانے کی کوشش کی جائے گی۔

Source: PC- tv9bangla