سابقہ اسمبلی چناﺅ میں مگراہٹ سے بی جے پی کے امیدوار کی بیٹی نے انتقام کی بات کہی

2021 کے اسمبلی انتخابات کے نتائج کے دن مگراہٹ مغربی حلقہ سے بی جے پی امیدوار دھورجٹی ساہا (مانس) پر ہونے والے وحشیانہ حملے اور ان کی موت کا زخم ایک بار پھر تازہ ہو گیا ہے۔ ریاست میں بی جے پی کی حکومت آتے ہی اب ان کی بیٹی نے انصاف اور 'بدلے' کی مانگ کی ہے۔ الزام ہے کہ ترنمول کانگریس کے حامی شرپسندوں نے گنتی مرکز کے اندر ہی بی جے پی امیدوار دھورجٹی ساہا پر حملہ کیا اور انہیں بے دردی سے زدوکوب کیا۔ حملے کے بعد انہیں بے ہوشی کی حالت میں اسپتال لے جایا گیا۔ اہل خانہ کا کہنا ہے کہ اسپتال لے جاتے وقت بھی قدم قدم پر رکاوٹیں کھڑی کی گئیں۔ علاج کے دوران زخموں کی تاب نہ لاتے ہوئے وہ دم توڑ گئے۔ریاست میں سیاسی تبدیلی اور بی جے پی کے برسرِاقتدار آنے کے بعد دھورجٹی ساہا کی بیٹی نے جذباتی بیان دیتے ہوئے کہا:"پچھلے پانچ سالوں سے ہم انصاف کے لیے تڑپ رہے تھے۔ میرے والد کا قصور صرف اتنا تھا کہ وہ انتخاب لڑ رہے تھے۔ اب جب کہ بی جے پی کی حکومت آ گئی ہے، مجھے امید ہے کہ میرے والد کے قاتلوں کو سزا ملے گی۔ اب ہمیں بدلہ چاہیے۔" اہل خانہ کا کہنا ہے کہ اس وقت پولیس نے ان کی شکایت پر کوئی ٹھوس کارروائی نہیں کی تھی، لیکن اب انتظامیہ بدلنے کے ساتھ ہی وہ اس کیس کو دوبارہ کھولنے اور مجرموں کو کیفرِ کردار تک پہنچانے کے لیے پرامید ہیں۔ مگراہٹ کے مقامی بی جے پی کارکنوں نے بھی اس معاملے میں خاندان کا ساتھ دینے کا اعادہ کیا ہے۔

Source: PC-sangbadpratidin