نندنی کی برطرفی کے عمل پر ترنمول کا سوال، راجیہ سبھا سے واک آوٹ

کولکاتا16مارچ :مغربی بنگال کے اعلیٰ بیوروکریٹس کے تبادلے کے عمل کے خلاف احتجاج کرتے ہوئے ترنمول کانگریس نے راجیہ سبھا سے واک آوٹ کیا۔ ریاست میں انتخابات کے اعلان کی رات ہی الیکشن کمیشن نے چیف سکریٹری اور ہوم سکریٹری کو ان کی ذمہ داریوں سے سبکدوش کر دیا تھا۔ ریاست کی حکمراں جماعت ترنمول نے سوال اٹھایا ہے کہ آدھی رات کو اس طرح تبادلے کیوں کیے گئے۔ اتوار کو ووٹوں کے اعلان کے چند گھنٹوں کے اندر ہی نندنی چکرورتی کو چیف سکریٹری کے عہدے سے ہٹانے کا فیصلہ سامنے آیا۔ جگدیش پرساد مینا کو بھی ہوم سکریٹری کی ذمہ داری سے ہٹا دیا گیا۔ کسی کو یاد نہیں پڑتا کہ ریاست میں آخری بار کب کسی چیف سکریٹری کو اس طرح عہدے سے ہٹایا گیا تھا۔ ان اعلیٰ افسران کی برطرفی کے خلاف پیر کو ترنمول نے راجیہ سبھا سے واک آوٹ کیا۔ ایوانِ بالا میں 'زیرو آور' سے ٹھیک پہلے ترنمول کے رکن پارلیمان ڈیرک او برائن نے اعلیٰ بیوروکریٹس کی برطرفی کا معاملہ اٹھایا۔ انہوں نے آدھی رات کو کمیشن کے اس اقدام کی مذمت کرتے ہوئے کہا، "کمیشن نے رات گئے چیف سکریٹری، پرنسپل سکریٹری اور ہوم سکریٹری کو ان کے عہدوں سے ہٹا دیا ہے۔ ان کے پاس ایسا کرنے کے تمام اختیارات موجود ہیں۔" ڈیرک او برائن سفید قمیض پہن کر ایوان میں آئے تھے، اپنی پوشاک کا حوالہ دیتے ہوئے انہوں نے طنزیہ انداز میں کہا، "وہ (کمیشن) کہہ سکتے ہیں کہ میں نے سفید نہیں بلکہ نیلی قمیض پہنی ہوئی ہے۔ لیکن اس احتجاج میں ہم، ترنمول کے ارکان پارلیمان، آج کے لیے ایوان سے واک آو¿ٹ کر رہے ہیں۔"جب ڈیرک اور دیگر ارکان راجیہ سبھا سے واک آو¿ٹ کر رہے تھے، تقریباً اسی وقت ریاست میں مزید کئی تبادلے عمل میں آ چکے تھے۔ پولیس کے کئی اعلیٰ حکام کو ذمہ داریوں سے ہٹا دیا گیا، جن میں ریاست کے پولیس سربراہ پیوش پانڈے اور کولکتہ کے پولیس کمشنر بھی شامل ہیں۔ اس کے ساتھ ہی کمیشن نے پولیس انتظامیہ میں مزید کئی تبدیلیوں کے فیصلے سے بھی آگاہ کیا۔

Source: PC- anandabazar