نابالغ گھریلو ملازمہ کا 'قتل'، لاش ماربل گودام سے ملی

کولکاتا6مارچ ؒنابالغ ملازمہ کے قتل کا الزام مالک اور اس کے بیٹے پر لگا ہے۔ قتل کے بعد لاش کو گودام میں چھپانے کا بھی الزام ہے۔ قتل کے اس مبینہ واقعے کے خلاف بیربھوم کا سائیں تھیا احتجاج کی آگ میں جل رہا ہے۔ مشتعل ہجوم نے تھانے کے سامنے زبردست احتجاجی مظاہرہ کیا۔متاثرہ لڑکی سائیں تھیا کے وارڈ نمبر دو کے رہائشی پنکج پاریکھ کے گھر پچھلے دو سال سے کام کر رہی تھی۔ وہ دیریا پور کے کانچن نگر باگ ڈولا علاقے کی رہنے والی تھی۔ گاوں کی ہی ایک خاتون کے ذریعے وہ اس گھر میں کام کرنے آئی تھی اور وہیں رہتی تھی۔ خاندان کا الزام ہے کہ جمعرات کی دوپہر تقریباً 3 بجے وہاں کام کرنے والی لپی باوری نے فون کر کے بتایا کہ لڑکی بیمار ہے اور اسے سائیں تھیا ہسپتال لے جایا گیا ہے۔ مزید دعویٰ ہے کہ جب وہ وہاں پہنچے تو بتایا گیا کہ اسے رام پور ہاٹ میڈیکل لے جایا گیا ہے۔ وہاں سے ٹوٹو (ای رکشہ) کرایہ پر لے کر رام پور ہاٹ جانے کی بات ہوئی۔ تاہم، وہ ٹوٹو مدن پور علاقے میں 'جین ماربل' نامی دکان کے گودام کے سامنے جا کر رک گیا۔ وہیں سے نابالغ لڑکی کی لاش برآمد ہوئی۔ خاندان نے مالک پنکج اور اس کے بیٹے شریاس پر لڑکی کے قتل کا الزام لگایا ہے۔ ملزمان کی گرفتاری کے مطالبے پر آج، جمعہ کی صبح خاندان کے افراد اور مقامی لوگوں نے سڑک بلاک کر دی۔ بعد میں ناکہ بندی ختم کر دی گئی۔ اس کے بعد مشتعل ہجوم نے سائیں تھیا تھانے کے سامنے احتجاج کیا۔ انہوں نے ملزمان کے لیے سخت سزا کا مطالبہ کیا ہے۔ پولیس نے لاش کو پوسٹ مارٹم کے لیے بھیج کر واقعے کی تفتیش شروع کر دی ہے۔ علاقے میں شدید تناو پایا جاتا ہے۔

Source: PC- sangbadpratidin