مرشد آباد واقعہ میں این آئی اے کی تحقیقات میں مداخلت کرنے سے سپریم کورٹ کا انکار

سپریم کورٹ نے مرشد آباد کے بیلڈانگہ میں ہونے والے تشدد کے واقعے کی این آئی اے تحقیقات میں مداخلت کرنے سے انکار کر دیا ہے۔ ریاستی حکومت کی درخواست پر سماعت کرتے ہوئے عدالتِ عظمیٰ نے واضح کیا کہ فی الحال این آئی اے ہی اس معاملے کی جانچ جاری رکھے گی۔چیف جسٹس سوریا کانت اور جسٹس جے مالیا باغچی کے بینچ نے کہا کہ چونکہ این آئی اے پہلے ہی ایف آئی آر درج کر چکی ہے، اس لیے وہ اس مرحلے پر مداخلت نہیں کریں گے۔ عدالت نے یو اے پی اے کی دفعہ 15 کے اطلاق پر فوری رائے دینے سے گریز کیا اور یہ معاملہ کلکتہ ہائی کورٹ پر چھوڑ دیا کہ وہ طے کرے کہ کیا اس کیس میں دہشت گردی کی دفعات لگانا درست ہے۔ این آئی اے کو ہدایت دی گئی ہے کہ وہ ایک سربمہر لفافے میں اپنی تحقیقاتی رپورٹ کلکتہ ہائی کورٹ میں جمع کرائے تاکہ یہ دیکھا جا سکے کہ کیا یو اے پی اے لگانے کے لیے کافی مواد موجود ہے۔ ریاستی حکومت نے ہائی کورٹ کے اس فیصلے کو چیلنج کیا تھا جس میں تحقیقات مرکزی ایجنسی کو سونپی گئی تھی۔ مرکز کا موقف تھا کہ بیلڈانگہ کا علاقہ سرحد کے قریب ہونے کی وجہ سے حساس ہے اور وہاں مہلک ہتھیار استعمال ہوئے، جبکہ ریاست کا دعویٰ تھا کہ پولیس پہلے ہی 33 افراد کو گرفتار کر کے کارروائی کر چکی ہے۔ بیلڈانگہ میں یہ کشیدگی گزشتہ ماہ جھارکھنڈ میں ایک مہاجر مزدور کی موت کے بعد شروع ہوئی تھی۔

Source: PC- anandabazar