مودی کے جلسے میں جاتے ہوئے ٹرین حادثے کا شکار ہونے والے بی جے پی حامیوں کے گھرپہنچے ترنمول کے رہنما

ندیا 20دسمبر: ندیا کے طاہر پور میں وزیر اعظم نریندر مودی کے جلسے میں شرکت کے لیے مرشد آباد سے بی جے پی حامی آئے تھے۔ ٹرین کی زد میں آنے سے ان میں سے تین افراد کی موت ہو گئی۔ ہفتہ کی صبح ہی ترنمول کانگریس کے کل ہند جنرل سکریٹری ابھیشیک بنرجی نے مقامی ترنمول قیادت کو ہدایت دی کہ وہ جاں بحق ہونے والے بی جے پی حامیوں کے اہل خانہ سے ملاقات کریں۔ ان کی ہدایت پر مقامی رہنما مرشد آباد پہنچ گئے ہیں۔ ہفتہ کو طاہر پور میں وزیر اعظم کا پہلے انتظامی اور پھر ایک سیاسی جلسہ ہونا طے تھا۔ اس سلسلے میں دور دراز علاقوں سے بی جے پی حامی نادیہ پہنچے تھے۔ مرشد آباد سے کم از کم 40 افراد ایک بس کرایہ پر لے کر آئے تھے اور صبح سویرے ہی طاہر پور پہنچ گئے۔ مقامی ذرائع کے مطابق، ان میں سے کچھ لوگ طاہر پور اسٹیشن کے قریب ریلوے لائن پر رفع حاجت کے لیے گئے تھے۔ دھند کی وجہ سے وہ ٹرین کی آمد کا اندازہ نہ کر سکے اور ٹرین کی ٹکر سے تین افراد کی موقع پر ہی موت ہو گئی، جبکہ دو افراد اسپتال میں زیر علاج ہیں۔ بی جے پی حامیوں کی موت کی خبر ملتے ہی ترنمول کانگریس سرگرم ہو گئی۔ ابھیشیک بنرجی کے دفتر سے ہدایت جاری کی گئی کہ فوری طور پر جاں بحق افراد کے لواحقین سے ملاقات کی جائے۔ اپنے لیڈر کی ہدایت ملتے ہی مقامی ترنمول رہنما مرشد آباد کے لیے روانہ ہو گئے۔ بڑواں پہنچ کر انہوں نے تینوں متوفی افراد کے رشتہ داروں سے بات کی اور تعزیت کا اظہار کیا۔ ریاست کی حکمراں جماعت کی جانب سے امداد کی یقین دہانی بھی کرائی گئی ہے۔ ابھیشیک بنرجی نے کاندی کے ایم ایل اے اپوروا سرکار (ڈیوڈ) کو فون کر کے مرشد آباد جانے کی ہدایت دی تھی، لیکن چونکہ ڈیوڈ ضلع سے باہر تھے، اس لیے انہوں نے بڑواں بلاک ترنمول صدر ماہے عالم اور دیگر رہنماو¿ں کو بھیج دیا۔ انہوں نے کہا ہے کہ وہ خود بعد میں جائیں گے۔

Source: PC- anandabazar