ریاست سے باہر علاج کرانے کے لیے اب وزراءکو وزیر اعلیٰ کی اجازت لینا لازمی! محکمہ داخلہ کا نوٹیفکیشن جاری

مغربی بنگال کے وزیر اعلیٰ، وزراء اور ان کے اہل خانہ کے لیے نوانّہ (ریاستی سیکرٹریٹ) نے نئے اور سخت قوانین نافذ کر دیے ہیں۔ اب ریاست سے باہر علاج کرانے کے لیے پہلے کی طرح براہ راست فیصلہ نہیں لیا جا سکے گا۔ حال ہی میں محکمہ داخلہ کی جانب سے جاری کردہ نوٹیفکیشن اور 'دی کولکتہ گزٹ' میں شائع ہونے والی ہدایات میں واضح کیا گیا ہے کہ اگر ریاست سے باہر ملک کے کسی دوسرے ہسپتال میں علاج کروانا ہو تو اس کے لیے وزیر اعلیٰ کی منظوری لینا لازمی ہوگا۔ انتظامی حلقوں کا ماننا ہے کہ اس فیصلے سے اخراجات پر قابو پانے کے ساتھ ساتھ پورے عمل میں مزید شفافیت آئے گی۔ واضح رہے کہ بائیں بازو کے دورِ اقتدار میں اس وقت کے وزیر مانو مکھوپادھیائے کی جانب سے سرکاری خرچ پر ایک مہنگے چشمے کی قیمت لینے پر تنازع کھڑا ہوا تھا۔ موجودہ وزیر اعلیٰ ممتا بنرجی کے دور میں بھی وزیر ساوتری مترا کے ایک میڈیکل بل پر بحث ہوئی تھی۔ اب ریاستی حکومت نے وزراءکے علاج کے اخراجات کو منظم کرنے کے لیے یہ قدم اٹھایا ہے۔ اس سے قبل ریاست سے باہر سرکاری خرچ پر علاج کے لیے ایسی اجازت کی ضرورت نہیں تھی، اس لیے اس نئے قانون کو انتظامی لحاظ سے کافی اہم سمجھا جا رہا ہے۔ نوانّہ کے ایک اہلکار نے بتایا کہ گزشتہ چند برسوں میں دیکھا گیا ہے کہ کئی وزراءکسی خاص بیماری کے بغیر ہی دوسری ریاستوں میں سالانہ طبی معائنے (چیک اپ) کروا کر بھاری رقم کے بل جمع کروا رہے ہیں۔ ریاستی انتظامیہ کے اندر ان معاملات پر طویل بحث ہوئی، جس کے بعد وزیر اعلیٰ ممتا بنرجی کے زیرِ انتظام محکمہ داخلہ نے یہ سخت قدم اٹھایا ہے۔

Source: PC- anandabazar