مغربی بنگال: پانا گڑھ کے قریب مال گاڑی کے چار ڈبے پٹری سے اتر گئے

درگاپور، 10 جون: مغربی بنگال کے ضلع مغربی بردھمان میں واقع پانا گڑھ ریلوے اسٹیشن کے قریب بدھ کی صبح ایک مال گاڑی کے چار ڈبے پٹری سے اتر گئے ، جس کے باعث ریل ٹریفک متاثر ہوئی اور ایک ریلوے پھاٹک تقریباً دو گھنٹے تک بند رہا۔ریلوے حکام کے مطابق پانا گڑھ انڈسٹریل پارک سے سامان لے کر ہاوڑہ-دہلی مین لائن کی جانب جانے والی مال گاڑی جیسے ہی پانا گڑھ اسٹیشن کی طرف جانے والی سست رفتار لائن (سلو لائن) پر داخل ہوئی، اس کے چار ڈبے اچانک پٹری سے اتر گئے ۔ حکام نے بتایا کہ پٹری سے اترنے والے ڈبے تقریباً 500 میٹر تک گھسٹتے ہوئے آگے بڑھتے رہے ، جس کے بعد ٹرین اسٹیشن کے قریب جا کر رک گئی۔حادثے کے نتیجے میں ریلوے پھاٹک نمبر 103 کو عارضی طور پر بند کرنا پڑا، جس سے روزانہ سفر کرنے والے مسافروں اور مقامی رہائشیوں کو مشکلات کا سامنا کرنا پڑا۔ یہ پھاٹک ان افراد کے لیے اہم راستہ ہے جو روزانہ ٹرین پکڑنے کے لیے پٹریاں عبور کرتے ہیں۔ واقعے کی اطلاع ملتے ہی ریلوے ملازمین اور افسران نے ہنگامی بنیادوں پر بحالی اور امدادی کارروائیاں شروع کر دیں۔ تقریباً دو گھنٹے کی مسلسل کوششوں کے بعد تمام متاثرہ ڈبوں کو دوبارہ پٹری پر چڑھا دیا گیا، جس کے بعد ٹرینوں کی آمد و رفت معمول کے مطابق بحال ہو گئی۔ریلوے حکام کے مطابق اس حادثے کے نتیجے میں ریلوے ٹریک پر نصب متعدد کنکریٹ سلیب بھی نقصان کا شکار ہوئے ہیں۔ حادثے کی وجوہات جاننے کے لیے مزید تحقیقات جاری ہیں۔

Source: UNI NEWS