مغربی بنگال میں انتخابات منسوخ کر کے صدر راج نافذ کرنے کی سازش، ممتا بنرجی کا بی جے پی پر بڑا الزام

مغربی بنگال کی وزیراعلیٰ ممتا بنرجی نے اسمبلی انتخابات سے قبل ایک بڑا سیاسی الزام عائد کرتے ہوئے کہا ہے کہ بھارتیہ جنتا پارٹی ریاست میں ہونے والے آئندہ انتخابات کو منسوخ کرانے اور صدر راج نافذ کرنے کی سازش کر رہی ہے۔ انہوں نے یہ بات جمعرات کو مرشد آباد ضلع کے ساگر دیغی میں ایک انتخابی جلسے سے خطاب کے دوران کہی، جہاں انہوں نے مرکزی حکومت، الیکشن کمیشن اور بی جے پی کو شدید تنقید کا نشانہ بنایا۔ ممتا بنرجی نے دعویٰ کیا کہ ریاست میں انتظامیہ ان کے کنٹرول میں نہیں رہی کیونکہ انتخابی ضابطۂ اخلاق کے نفاذ کے بعد قانون و نظم کی ذمہ داری الیکشن کمیشن کے پاس ہے، جو مبینہ طور پر مرکزی وزیر داخلہ امت شاہ کے اشاروں پر کام کر رہا ہے۔ انہوں نے کہا کہ ریاستی انتظامیہ کے اعلیٰ عہدیداران جیسے چیف سکریٹری، ہوم سکریٹری، ڈی جی پی اور دیگر افسران کو تبدیل کر دیا گیا ہے، جس سے حکومتی کام کاج متاثر ہوا ہے۔

Source: social media