متوا کو تو شہریت نہیں ملی الٹا ان کے نام ہی ووٹر لسٹ سے کاٹ دیئے گئے: ابھیشیک بنرجی

مغربی بنگال میں دوسرے مرحلے کی انتخابی مہم کے آخری دن، ترنمول کانگریس کے آل انڈیا جنرل سکریٹری ابھیشیک بنرجی نے 'متوا' برادری کے گڑھ رانا گھاٹ میں بی جے پی پر سخت حملہ کیا۔ انہوں نے شہریت اور فہرست رائے دہندگان سے ناموں کے اخراج جیسے حساس مسائل پر بی جے پی کو کٹہرے میں کھڑا کیا۔ "بی جے پی نے 2019 میں وعدہ کیا تھا کہ وہ 31 دسمبر تک تمام متواوں کو شہریت دے دیں گے۔ اتنے سال گزر گئے، کیا آپ کو شہریت ملی؟ شہریت دینا تو دور کی بات، الٹا ووٹر لسٹوں سے جائز ووٹروں کے نام کاٹ دیے گئے ہیں۔"انہوں نے بی جے پی لیڈر اور مرکزی وزیر شانتنو ٹھاکر پر تنقید کرتے ہوئے کہا کہ وہ کہتے ہیں کہ نام کٹ جانے سے کوئی فرق نہیں پڑتا۔ کیا یہ برادری کے ساتھ دشمنی نہیں ہے؟ انتخابات سے پہلے رقم کی تقسیم کے حوالے سے ووٹروں کو خبردار کرتے ہوئے انہوں نے کہا:"ووٹ میں اب صرف ایک دن باقی ہے۔ بی جے پی والے پیسے بانٹنے آئیں گے۔ آپ ان سے خوب سودے بازی کریں، ان سے پیسے لے لیں، لیکن ووٹ 'جوڑا پھول' کو ہی دیں۔"ابھیشیک بنرجی نے رانا گھاٹ کے تینوں حلقوں (شمال مشرقی، شمال مغربی اور جنوبی رانا گھاٹ) کے امیدواروں کی حمایت میں کہا: انہوں نے وعدہ کیا کہ اگر ٹی ایم سی امیدوار جیتتے ہیں تو 'بنگلہ آواس یوجنا' کے تحت ہر غریب کے سر پر پکی چھت فراہم کی جائے گی۔ انہوں نے سوال اٹھایا کہ رانا گھاٹ سے بی جے پی کے ایم پی اور ایم ایل اے ہونے کے باوجود یہاں کیا ترقی ہوئی؟ انہوں نے دعویٰ کیا کہ صرف ممتا بنرجی کی حکومت ہی متوا برادری کی حقیقی خیر خواہ ہے۔

Source: PC-sangbadpratidin