میٹرک کے امتحان میں طالب علم پستول کے ساتھ پہنچ گیا

بدھ کے روز میٹرک (مادھومک) کے لائف سائنس کا امتحان تھا۔ ایک طالب علم امتحانی مرکز میں پستول لے کر پہنچ گیا! اسکول میں داخلے سے قبل جب اس کے بیگ کی تلاشی لی گئی تو پستول برآمد ہوئی، جس سے اساتذہ اور دیگر طلبہ میں شدید خوف و ہراس پھیل گیا۔ یہ سنسنی خیز واقعہ مشرقی بردوان میں پیش آیا، جہاں پولیس نے موقع پر پہنچ کر صورتحال کو سنبھالا اور پستول برآمد کر لی۔ بتایا گیا ہے کہ وہ طالب علم سڑک پر انگلیوں میں پستول گھماتے ہوئے اسکول جا رہا تھا اور اس کے ساتھ دو دوست بھی موجود تھے۔ تفصیلات کے مطابق، 'بردوان ادے پلی شکشا نکیتن' کے ایک طالب علم کا سینٹر 'رام کرشن اسکول' میں پڑا تھا۔ حسبِ معمول جب اسکول کے گیٹ پر بیگ چیک کیے جا رہے تھے، تو اساتذہ یہ دیکھ کر دنگ رہ گئے کہ ایڈمٹ کارڈ اور قلم کے ساتھ بیگ میں ایک پستول بھی رکھی تھی۔ اس واقعے سے پورے اسکول میں کھلبلی مچ گئی اور طلبہ ڈر گئے۔ طالب علم کو فوراً پکڑ لیا گیا اور بردوان تھانے کو اطلاع دی گئی۔ پولیس نے جب پستول قبضے میں لی تو ایک اور انکشاف ہوا؛ جسے سب اصلی پستول سمجھ رہے تھے وہ دراصل ایک نکلی پستول تھی، جو بالکل پستول کی شکل کا ایک گیس لائٹر تھا۔ اب سوال یہ اٹھ رہا ہے کہ طالب علم نے ایسا کیوں کیا؟ کیا یہ محض مذاق تھا یا کسی سے بدلہ لینے کی نیت؟

Source: PC- sangbadpratidin