ممتا بنرجی کا بھوانی پور تشدد پر بی جے پی قیادت پر سخت حملہ کیا

کولکاتہ، 5 اپریل (: مغربی بنگال کی وزیر اعلیٰ ممتا بنرجی نے بھوانی پور میں اپوزیشن کے رہنما شبھیندو ادھیکاری کے نامزدگی کے دوران پیش آئے تشدد کے معاملے پر بی جے پی کی اعلیٰ قیادت پر سخت تنقید کی ہے ۔ انہوں نے الزام لگایا کہ یہ بدامنی منصوبہ بند تھی اور باہر کے لوگوں کو لا کر اسے انجام دیا گیا۔ محترمہ ممتا بنرجی نے اتوار کو مرشدآباد کے جیاگنج میں ایک انتخابی ریلی سے خطاب کرتے ہوئے زعفرانی خیمے پر نامزدگی ریلی کی آڑ میں جان بوجھ کر گڑبڑ پیدا کرنے کا الزام لگایا۔ مرکزی وزیر داخلہ امت شاہ کی موجودگی میں ہوئے روڈ شو کا ذکر کرتے ہوئے انہوں نے اسے "منصوبہ بند حملہ" قرار دیا۔ وزیر اعلیٰ نے الزام لگایا، "بھوانی پور میں میرے گھر کے بالکل سامنے حملہ کیا گیا۔ انہوں نے میرے پوسٹروں پر تھوکا اور مقامی کالی مندر کے سامنے جوتے دکھائے ۔ یہاں تک کہ مسٹر ابھیشیک کی رہائش گاہ کی طرف بھی جوتے دکھائے گئے ۔" انہوں نے کہا کہ مقامی باشندوں نے اس طرح کے رویے کی مخالفت کی ہے ۔ انہوں نے طنزیہ انداز میں کہا، "یہ سیاست نہیں ہے ۔ وہ نامزدگی کے لیے باہر سے لوگ لے کر آئے تھے ۔" اس دوران الیکشن کمیشن نے اس واقعے پر سخت انتظامی کارروائی کی ہے ۔ چیف الیکشن کمشنر گیانیش کمار کی مبینہ ناراضگی کے بعد، قانون و انتظام برقرار رکھنے میں ناکامی پر چار پولیس افسران کو معطل کر دیا گیا ہے ۔ کمیشن نے ان کے خلاف محکمانہ جانچ کے بھی احکامات جاری کیے ہیں۔

Source: UNI NEWS