ممتا بنرجی نے پولیس، مرکزی فورسز، اور بی جے پی حکومت پر سخت تنقید کی

باروئی پور میں اپنی انتخابی مہم کے دوران ممتا بنرجی نے پولیس، مرکزی فورسز، اور بی جے پی حکومت پر سخت تنقید کی ہے۔ ممتا بنرجی نے مقامی پولیس پر برہمی کا اظہار کرتے ہوئے کہا کہ وہ مرکزی فورسز کے سامنے جھک رہی ہے۔ انہوں نے سوال کیا، "مرکزی فورسز اور الیکشن کمیشن کا ساتھ صرف دو تین ہفتوں کے لیے ہے، اس کے بعد آپ (پولیس) کہاں جائیں گے؟ ہم یہاں ہیں اور رہیں گے۔"انہوں نے الزام لگایا کہ ایک ریٹائرڈ افسر ورچوئل میٹنگز کے ذریعے ترنمول لیڈروں کو گرفتار کرنے اور ان کی گاڑیوں میں گانجا رکھنے جیسی سازشیں کر رہے ہیں۔انہوں نے کارکنوں کو ہدایت دی کہ وہ ای وی ایم اور گنتی کی مشینوں کا خیال رکھیں۔ خراب مشینوں پر ووٹنگ نہ ہونے دیں اور وی وی پیٹ کے بغیر ووٹنگ قبول نہ کریں۔انہوں نے انتخابی ڈیوٹی پر مامور افراد کو خبردار کیا کہ وہ پیسوں کے لالچ میں نہ آئیں اور چائے یا پانی میں کسی بھی قسم کی ملاوٹ سے ہوشیار رہیں۔ انہوں نے کہا کہ عوام نے نوٹ بندی اور آدھار کارڈ کے لیے لمبی لائنوں میں لگ کر تکلیفیں اٹھائی ہیں، اب بی جے پی کو "بے لائن" (سیاسی طور پر ختم) کرنے کا وقت آگیا ہے۔ انہوں نے مودی حکومت کے 2 کروڑ ملازمتوں کے وعدے پر تنقید کرتے ہوئے دعویٰ کیا کہ بنگال میں 2 کروڑ لوگوں کو روزگار دیا گیا ہے۔ممتا بنرجی نے یقین دلایا کہ 'لکشمیر بھنڈار' اسکیم تاحیات جاری رہے گی اور کسی کے سامنے بھیک مانگنے کی ضرورت نہیں پڑے گی۔ انہوں نے کسانوں کے بجلی بلوں کی معافی، صحت ساتھی، مفت راشن، اور بزرگوں کے علاج کے لیے 25 فیصد امداد جیسے 105 منصوبوں کا ذکر کیا۔ انہوں نے باروئی پور میں فلائی اوور کی تعمیر اور مقامی امرود کو جی آئی ٹیگ ملنے کا تذکرہ کرتے ہوئے مقامی لوگوں سے جذباتی رشتہ جوڑا۔ ممتا بنرجی نے عوام سے اپیل کی کہ وہ بی جے پی کے "تکبر" کو ختم کرنے کے لیے ترنمول کانگریس کو ووٹ دیں، کیونکہ ان کی لڑائی بنگال کی ماوں اور بہنوں کے ساتھ مل کر ہے۔

Source: PC-sangbadpratidin