ممتا بنرجی نے قبضہ کی سیاست اور غیر قانونی تعمیرات پر سخت وارننگ دی

پانی ہاٹی اسمبلی حلقہ کی انتخابی مہم کے دوران ترنمول سپریمو ممتا بنرجی نے قبضہ کی سیاست اور غیر قانونی تعمیرات کے حوالے سے کونسلرز اور چیئرمینوں کو سخت وارننگ دی ہے۔ ۲۰۲۶ کے اسمبلی انتخابات میں پانی ہاٹی ایک انتہائی اہم مرکز بن چکا ہے، خاص طور پر آر جی کر کی متاثرہ ڈاکٹر کی والدہ کے بی جے پی امیدوار بننے سے یہاں کا مقابلہ مزید دلچسپ ہو گیا ہے۔ ترنمول کی جانب سے یہاں سبکدوش ہونے والے ایم ایل اے نرمل گھوش کے بیٹے تیرتھنکر گھوش میدان میں ہیں۔ جمعرات کو اوشم پور ودیا ساگر اسپورٹس گراونڈ میں منعقدہ جلسے سے ممتا بنرجی کے خطاب کے اہم نکات درج ذیل ہیں:وزیر اعلیٰ نے واضح کیا کہ ترنمول میں رہنا ہے تو میدانوں پر قبضہ یا ہریالی (سبزہ) کو ختم کرنا نہیں چلے گا۔ انہوں نے سود پور کے مشہور امراوتی میدان پر قبضے کی کوشش کا حوالہ دیتے ہوئے اپنی ناراضگی کا اظہار کیا۔ کونسلرز اور چیئرمینوں کو متنبہ کرتے ہوئے انہوں نے کہا کہ غیر قانونی تعمیرات کسی صورت برداشت نہیں کی جائیں گی۔ممتا بنرجی نے کہا، "اگر آپ یہ سوچتے ہیں کہ میں کولکتہ میں رہتی ہوں تو مجھے پانی ہاٹی یا مالدہ کی خبر نہیں ہوگی، تو یہ آپ کی بھول ہے۔ میرے پاس ہر جگہ کی خبر رہتی ہے۔"۲۰۲۵ میں امراوتی میدان کے ایک حصے پر قبضے کی شکایت موصول ہوئی تھی۔ الزام تھا کہ پانی ہاٹی میونسپلٹی کی بالواسطہ حمایت سے وہاں تعمیراتی کام کی کوشش کی جا رہی تھی۔معاملہ علم میں آتے ہی وزیر اعلیٰ نے فوری مداخلت کی اور کام بند کروا دیا۔ اس واقعے کے نتیجے میں پانی ہاٹی میونسپلٹی کے اس وقت کے چیئرمین کو اپنی کرسی بھی گنوانی پڑی تھی۔

Source: PC-sangbadpratidin