ماں کینٹین' میں 5 روپے میں مچھلی اور چاول بھی ملیں گے

کورونا کے دور میں غریبوں کی ضرورتوں کو مدنظر رکھتے ہوئے ترنمول حکومت نے 'ماں کینٹین' کا آغاز کیا تھا، جہاں محض 5 روپے میں پیٹ بھر کر انڈا اور چاول ملتا تھا۔ ریاست میں بی جے پی کے برسرِاقتدار آتے ہی اب مینو میں تبدیلی کا فیصلہ کیا گیا ہے۔ وزیر دلیپ گھوش نے اطلاع دی ہے کہ اب 5 روپے میں مچھلی اور چاول فراہم کیے جائیں گے۔ مانا جا رہا ہے کہ مینو میں مچھلی شامل کر کے بی جے پی یہ پیغام دینا چاہتی ہے کہ ترنمول طویل عرصے سے عوام کو گمراہ کر رہی تھی۔تقریباً چھ سال قبل جب کورونا کی لہر بنگال میں آئی اور ملک بھر میں لاک ڈاون نافذ ہوا، تو بہت سے لوگ شدید مالی مشکلات کا شکار ہو گئے۔ اس وقت اس وقت کی وزیر اعلیٰ ممتا بنرجی نے ضرورت مندوں کے لیے 'ماں کینٹین' شروع کی تھی۔ اب ریاست کی باگ ڈور بی جے پی حکومت کے ہاتھ میں ہے، جس کے نتیجے میں مختلف شعبوں میں تبدیلیاں کی جا رہی ہیں اور اسی فہرست میں اب ماں کینٹین بھی شامل ہے۔ ریاستی وزیر دلیپ گھوش نے بتایا کہ ماں کینٹین کے مینو میں تبدیلی کی جائے گی اور فی الحال 5 روپے میں ہی مچھلی-چاول ملیں گے۔ ساتھ ہی خوراک کی مقدار میں بھی اضافہ کیا جائے گا تاکہ غربت کی وجہ سے کوئی بھوکا نہ رہے۔ لیکن یہ نیا مینو کب سے دستیاب ہوگا؟ اس پر دلیپ گھوش نے کہا، ”وزیر اعلیٰ شویندو ادھیکاری نے پہلے ہی ہدایات جاری کر دی ہیں۔ لہٰذا بہت جلد نئی ڈش شروع کر دی جائے گی، تاہم انڈا بھی دستیاب رہے گا۔“بہت سے لوگوں کے ذہن میں سوال ہے کہ کیا 5 روپے میں مچھلی ممکن ہے؟ اس پر دلیپ گھوش نے واضح کیا کہ فی الحال قیمت بڑھانے کا کوئی فیصلہ نہیں کیا گیا ہے، مستقبل میں لاگت بڑھی تو حکومت اس پر غور کرے گی۔ قابلِ ذکر ہے کہ انتخابات سے پہلے ترنمول کی جانب سے بار بار یہ دعویٰ کیا گیا تھا کہ اگر بی جے پی اقتدار میں آئی تو وہ لوگوں کی غذائی عادات بدل دے گی اور بنگال کے لوگ مچھلی نہیں کھا سکیں گے۔ بی جے پی اب اپنے ان اقدامات سے ثابت کرنا چاہتی ہے کہ وہ دعوے مکمل طور پر بے بنیاد تھے۔

Source: PC-sangbadpratidin