لاری اور پولیس گاڑی کے درمیان تصادم میں دو پولیس اہلکار ہلاک، 3 شدید زخمی

مدنی پور : لاری اور پولیس گاڑی کے درمیان تصادم میں دو پولیس اہلکار ہلاک، 3 شدید زخمی۔ یہ المناک سڑک حادثہ چندرکونہ روڈ کے ست بنکورا علاقہ میں آدھی رات کو پیش آیا۔ ذرائع کے مطابق پولیس اہلکار ڈیوٹی جوائن کرنے جا رہے تھے۔ لیکن کون جانتا تھا کہ راستے میں اتنا بڑا حادثہ ہو جائے گا۔ پولیس وین مخالف سمت سے آنے والی لاری سے ٹکرا گئی۔ جس کے نتیجے میں دو پولیس اہلکار جان کی بازی ہار گئے۔ واقعے میں مزید تین افراد شدید زخمی ہوگئے۔ الیکشن سے ایک رات پہلے ہونے والے اس ہولناک حادثے نے علاقے میں زبردست سنسنی پیدا کر دی ہے۔پولیس ذرائع کے مطابق پولیس اہلکار مدنی پور سے گربیٹا تھانے میں ڈیوٹی جوائن کرنے جارہے تھے۔ جیسے ہی وہ چندرکونہ روڈ کے ست بنکورا علاقے میں پہنچے تو پولیس وین مخالف سمت سے آنے والی تیز رفتار لاری سے ٹکرا گئی۔ تصادم کی شدت اتنی تھی کہ ایک پولیس اہلکار موقع پر ہی جاں بحق ہوگیا۔ اس کے بعد مقامی لوگوں کی مدد سے باقیوں کو ریسکیو کرکے اسپتال لے جانے کا انتظام کیا گیا۔ لیکن ایک اور پولیس اہلکار راستے میں ہی زخموں کی تاب نہ لاتے ہوئے چل بسا۔ حادثے میں زخمی ہونے والے باقی تین پولیس اہلکاروں کو سب سے پہلے صبح تقریباً ایک بجے کے قریب مقامی دواریگیریہ دیہی اسپتال لے جایا گیا۔ تاہم ان کی چوٹیں سنگین ہونے کی وجہ سے انہیں رات کو مدنی پور میڈیکل کالج اسپتال منتقل کیا گیا۔ وہ اس وقت وہاں زیر علاج ہیں۔ دوسری جانب اس ہولناک حادثے کے بعد ڈرائیور جان لیوا لاری کو سڑک پر چھوڑ کر رات کی تاریکی میں فرار ہوگیا۔ پولیس پہلے ہی لاری کو ضبط کر چکی ہے۔ فرار ڈرائیور کی تلاش بھی زوروں پر ہے۔

Source: Social Media