کھویا ہوا موبائل فون ڈھونڈنے کے بہانے خاتون کی عصمت دری،ٹوٹو ڈرائیور گرفتار

بیر بھوم 24دسمبر : بیر بھوم کے علاقے رام پور ہاٹ میں ایک انتہائی افسوسناک واقعہ پیش آیا ہے، جہاں ایک ٹوٹو (ای رکشہ) ڈرائیور نے ایک خاتون مسافر کو اس کا گمشدہ موبائل فون تلاش کرنے کا جھانسہ دے کر اپنی ہوس کا نشانہ بنایا۔ پولیس نے ملزم کو گرفتار کر لیا ہے، جس کی شناخت سوجوئے مہرا کے نام سے ہوئی ہے۔منگل کی صبح رام پور ہاٹ پچھم پاڑہ کا رہائشی سوجوئے مہرا اپنے ٹوٹو کے ساتھ نکلا۔ ایک خاتون انتہائی پریشانی کی حالت میں اس کے ٹوٹو میں سوار ہوئیں۔ڈرائیور کے پوچھنے پر خاتون نے بتایا کہ ان کا موبائل فون ریلوے اسٹیشن کے علاقے میں کہیں گر گیا یا گم ہو گیا ہے۔ ملزم نے فون تلاش کرنے میں مدد کا وعدہ کیا اور خاتون کو دوبارہ اسٹیشن کے علاقے میں لے گیا۔ وہاں موبائل ڈھونڈنے کے بہانے وہ خاتون کو اسٹیشن کے قریب ایک سنسان اور متروکہ کمرے میں لے گیا، جہاں اس نے مبینہ طور پر خاتون کی عصمت دری کی۔متاثرہ خاتون کسی طرح وہاں سے فرار ہونے میں کامیاب ہوئیں اور فوری طور پر رام پور ہاٹ تھانے پہنچ کر تحریری شکایت درج کروائی۔پولیس نے فوری کارروائی کرتے ہوئے مختلف جگہوں پر چھاپے مارے اور روپوش ہونے کی کوشش کرنے والے ملزم سوجوئے مہرا کو دھر لیا۔بدھ کے روز ملزم کو رام پور ہاٹ عدالت میں پیش کیا گیا، جبکہ متاثرہ خاتون کا طبی معائنہ (میڈیکل ٹیسٹ) بھی کروایا گیا ہے۔اس واقعے کے بعد علاقے میں شدید غم و غصہ پایا جا رہا ہے اور ایک بار پھر خواتین کے تحفظ اور عوامی سواریوں کی حفاظت پر سنگین سوالات اٹھ رہے ہیں۔

Source: PC- sangbadpratidin