کنچڑا پاڑہ میونسپلٹی کے پندرہ کونسلروںنے ایک ساتھ استعفیٰ دے دیا

افواہیں سچ ثابت ہو گئیں۔ الزام ہے کہ ریاست میں سیاسی تبدیلی کے بعد سے ہی کانچرا پاڑہ میں ترنمول کی قیادت کے اندر دراڑیں نظر آنے لگی تھیں۔ آخر کار وہ واقعہ سب کے سامنے آ ہی گیا۔ کانچرا پاڑہ بلدیہ (میونسپلٹی) میں ترنمول کی پھوٹ کو ببلک کرتے ہوئے منگل کے روز ۱۵ کونسلرز نے ایک ساتھ استعفیٰ دے دیا۔ ان کے استعفیٰ نامے جمع ہوتے ہی بیج پور کے سیاسی حلقوں میں شدید سنسنی پھیل گئی ہے۔ ترنمول کی قیادت میں چلنے والے موجودہ بورڈ کے مستقبل پر بھی غیر یقینی کے بادل منڈلانے لگے ہیں۔ اسمبلی انتخابات کے نتائج کے اعلان کے بعد سے یہ بلدیہ عملی طور پر بغیر کسی قیادت کے چل رہی ہے۔ چیئرمین کمل ادھیکاری کی طویل غیر حاضری کے باعث کونسلرز کے ایک دھڑے میں ناراضگی مسلسل بڑھ رہی تھی۔ اس وجہ سے شہریوں کو ملنے والی بنیادی خدمات میں رکاوٹ پیدا ہونے کا خدشہ بھی پیدا ہو گیا تھا۔ صورتحال کو سنبھالنے کے لیے حال ہی میں بیج پور سے بی جے پی کے ایم ایل اے سدیپتو داس نے بلدیہ کا دورہ کیا اور حکام کے ساتھ میٹنگ کی۔ ذرائع کا دعویٰ ہے کہ اتوار کے روز کلیانی میں ترنمول کونسلرز کی میٹنگ میں ہی اس اجتماعی استعفے کا حتمی فیصلہ کر لیا گیا تھا۔

Source: PC-sangbadpratidin