کلیانی کے میڈیکل طالب علم کی موت میں قتل کا شبہ

کلیانی27فروری : جب کالج کے دیگر طلبہ تک یہ خبر پہنچی، تب تک مگراہاٹ کے رہنے والے پلک ہالدار کی لاش گلنا سڑنا شروع ہو گئی تھی۔ ان کے ہاسٹل کے کمرے کے باہر سے تعفن اٹھ رہا تھا۔ بند لکڑی کے دروازے کے پیچھے ان کی بے جان لاش پڑی ہوگی، ایسا کسی نے سوچا بھی نہ تھا۔ کلیانی جے این ایم ہسپتال اور میڈیکل کالج کے فائنل ایئر کے طالب علم پلک کی موت کے گرد شکوک و شبہات کے بادل منڈلا رہے ہیں۔آج یعنی جمعہ کو پلک کی لاش کا پوسٹ مارٹم ہونا ہے۔ ان کے والد سدھانشو ہالدار رشتہ داروں کے ہمراہ کلیانی پہنچ چکے ہیں، جس کے بعد اہل خانہ نے سنگین الزامات عائد کیے ہیں۔ خاندان کا دعویٰ ہے کہ پلک کے جسم پر زخموں کے متعدد نشانات موجود ہیں۔ یہ موت قدرتی نہیں ہے، بلکہ اس کے پیچھے قتل کی سازش ہو سکتی ہے۔ آج متوفی کے رشتہ دار اتم منڈل نے کہا، "وہ بہت اچھا لڑکا تھا۔ ہمیں اس سے بڑی امیدیں تھیں، لیکن لگتا ہے اسے قتل کیا گیا ہے۔" یہی دعویٰ پڑوسیوں کا بھی ہے۔ ان کا کہنا ہے کہ "لڑکے کے چہرے اور پیٹھ پر نشانات ہیں۔ اسے یقیناً قتل کیا گیا ہے۔ آر جی کر کے واقعے کی طرح اس معاملے کو بھی دبایا نہیں جانا چاہیے۔ یہ سب ایک سازش ہے۔" قابلِ ذکر ہے کہ جمعرات کی دوپہر میڈیکل کالج کے دیگر طلبہ نے پلک کے کمرے کا دروازہ توڑ کر اندر داخل ہوئے، جہاں بستر پر ان کی لاش پڑی تھی۔ اس کے فوراً بعد پولیس اور ہسپتال انتظامیہ موقع پر پہنچی اور فائنل ایئر کے طالب علم کی مسخ شدہ لاش برآمد کی۔ دیگر طلبہ کے مطابق، پلک کو آخری بار 20 فروری یعنی جمعہ کو ہاسٹل کی کینٹین میں کھانا کھاتے دیکھا گیا تھا، جس کے بعد سے وہ کمرے میں بند تھے۔ اہل خانہ نے بھی تصدیق کی ہے کہ پلک نے آخری بار 20 فروری کو اپنی ماں سے فون پر بات کی تھی۔ اس کے بعد ایسا کیا ہوا؟ انہوں نے اچانک خود کو کمرے میں کیوں بند کر لیا؟ یا پھر 20 تاریخ کو کچھ ایسا ہوا تھا جس کا نتیجہ جمعرات کو پورے کالج نے دیکھا؟ اس پراسرار موت نے کئی سوالات کھڑے کر دیے ہیں۔ ہاسٹل انتظامیہ کے کردار پر بھی انگلیاں اٹھ رہی ہیں۔ پڑوسیوں کا کہنا ہے کہ "ایک لڑکا پانچ دن سے کھانا کھانے نہیں آ رہا، ہاسٹل انتظامیہ کیا کر رہی تھی؟ کیا وہ ایک بار بھی اسے دیکھنے نہیں جا سکتے تھے؟

Source: PC- tv9bangla