جھال مڑی کھانے پر ممتا بنرجی نے مودی پر سخت تنقید کی

بنگال میں انتخابی مہم اب جھال مڑی کے گرد گھوم رہی ہے۔ پہلے مرحلے کی پولنگ سے قبل آخری اتوار کو وزیر اعظم نریندر مودی نے جنگل محل میں انتخابی مہم کے دوران دھواں دھار خطاب کیا۔ جھاڑگرام کے جلسے کے بعد انہوں نے جھال مڑی خریدی، خود بھی کھائی اور وہاں موجود لوگوں کو بھی کھلائی۔ انہوں نے دکاندار کو جھال مڑی کی قیمت کے طور پر 10 روپے بھی دیے۔ انتخابی مہم کے دوران ان کا اس طرح جھال مڑی کھانا ترنمول کانگریس کی نظر میں محض ایک 'سیاسی کرتب' ہے، جس پر انہوں نے سخت تنقید کی ہے۔ اب اس معاملے پر وزیر اعلیٰ اور ترنمول سپریمو ممتا بنرجی نے طنز کے تیر چلائے ہیں۔ پیر کے روز مرارئی کے جلسے سے خطاب کرتے ہوئے انہوں نے کہا، "میں نے سنا ہے کہ انہوں نے (نریندر مودی) کل جھال مڑی کھائی ہے۔ ایس پی جی سے مڑی بنوا کر کھائی ہے، دکان میں پہلے سے مائیک اور کیمرہ لگا ہوا تھا۔ یہ سب ڈرامہ ہے! ورنہ دکان کے اندر کیمرہ کیوں تھا؟ سنا ہے کہ انہوں نے قیمت بھی ادا کی ہے۔ کیا ان کی جیب میں 10 روپے رہتے بھی ہیں؟"

Source: PC-sangbadpratidin