ہمایون کبیر مشکل میں پھنسے ، ہیلی کوپٹر لینڈ کی اجازت نہیں

بھر ت پور کے سابق ایم ایل اے اور 'عام جنتا ترقی پارٹی' کے چیئرمین ہمایوں کبیر اپنے انتخابی مشن میں نئی مشکل میں پھنس گئے ہیں۔ انہوں نے الیکشن مہم کے لیے بھاری رقم دے کر ایک ہیلی کاپٹر کرائے پر لیا ہے، لیکن مقامی انتظامیہ کی جانب سے لینڈنگ کی اجازت نہ ملنے کی وجہ سے ان کا یہ 'اڑن کھٹولا' زمین پر ہی کھڑا رہنے پر مجبور ہے۔ ہمایوں کبیر نے اس صورتحال پر سخت برہمی کا اظہار کرتے ہوئے اسے سیاسی رکاوٹ قرار دیا ہے۔ ہمایوں کبیر کی پارٹی اور اسد الدین اویسی کی 'ایم آئی ایم' کے درمیان اتحاد ہوا ہے، جو ریاست کی 200 سے زائد نشستوں پر انتخاب لڑ رہے ہیں۔ مہم کو تیز کرنے کے لیے چنئی کی ایک کمپنی سے 4 اپریل سے 27 اپریل تک کے لیے ہیلی کاپٹر کرائے پر لیا گیا تھا۔ ہمایوں کبیر کا الزام ہے کہ مرکزی شہری ہوا بازی کی وزارت اور DGCA سے منظوری کے باوجود مقامی پولیس، فائر بریگیڈ اور ضلعی انتظامیہ این او سی دینے میں لیت و لعل سے کام لے رہی ہے۔ ہمایوں کے مطابق، 10 اور 11 اپریل کو شمالی دیناج پور، بیربھوم، مالدہ اور بھگوان گولہ میں جلسے طے تھے، لیکن ہیلی پیڈ کی اجازت نہ ملنے کی وجہ سے پروگرام متاثر ہو رہے ہیں۔ انہوں نے بتایا کہ شمالی بنگال کے ایک اسکول نے پہلے اجازت دی لیکن بعد میں دباو میں آکر اسے واپس لے لیا۔ ہمایوں کبیر نے بتایا کہ اسد الدین اویسی دوبارہ بنگال آ رہے ہیں، لیکن ہیلی کاپٹر کی اجازت نہ ہونے کی وجہ سے اویسی صاحب کو کولکتہ میں ایک پورا دن فارغ بیٹھنا پڑ سکتا ہے، جو کہ وقت اور پیسے دونوں کا زیاں ہے۔ہمایوں کبیر نے انتظامیہ کے اس رویے کو 'سفید ہاتھی پالنے' سے تشبیہ دیتے ہوئے کہا کہ لاکھوں روپے کرایہ دینے کے باوجود وہ اسے استعمال نہیں کر پا رہے ہیں۔ انہوں نے اسے اپوزیشن کی آواز دبانے کی کوشش قرار دیا ہے۔کیا آپ کو لگتا ہے کہ اس طرح کی انتظامی رکاوٹیں چھوٹے سیاسی اتحادوں کے لیے انتخابی مہم میں بڑی رکاوٹ بنتی ہیں؟

Source: PC-sangbadpratidin