ہوڑہ کے ترنمول کانگریس کے رہنما شمیم احمد عرف بڑے کو ممبئی سے گرفتار کیا گیا

انتخابات کے بعد ہونے والے تشدد اور بمباری کے مقدمے میں مفرور ہاوڑہ کے شیو پور کے ٹی ایم سی لیڈر شمیم احمد عرف بڑے کو مہاراشٹر کے شہر ممبئی سے گرفتار کر لیا گیا ہے۔ ان کے ساتھ ان کے دو ساتھیوں جاوید اختر اور کرانتی کو بھی پکڑا گیا ہے۔ یہ گرفتاری ممبئی کرائم برانچ اور ہاوڑہ سٹی پولیس کی مشترکہ کارروائی میں عمل میں آئی۔گزشتہ 9 مئی کو ہاوڑہ سٹی پولیس کے افسران نے وسطی ہاوڑہ کے شیو پور تھانہ علاقے کے وارڈ نمبر 36 میں بڑے کے تین منزلہ مکان پر چھاپہ مارا تھا۔ اس وقت بڑے تو نہیں ملے، لیکن ان کے گھر سے ایک 'خفیہ سیڑھی' ملی جو تیسری منزل سے دوسری منزل کی طرف جاتی تھی۔ دوسری منزل کے کمرے انتہائی پرتعیش اور قیمتی اشیاء سے بھرے ہوئے تھے، جس کی ویڈیو سوشل میڈیا پر وائرل ہونے سے کافی سنسنی پھیل گئی۔ بڑے اور ان کے ساتھیوں پر اسمبلی انتخابات کے نتائج کے اعلان کے بعد شیو پور تھانہ علاقے میں بمباری اور فائرنگ کرنے کا الزام ہے۔ اپوزیشن کا دعویٰ ہے کہ بڑے کو ٹی ایم سی کی پشت پناہی حاصل ہے اور وہ ریاست کے سابق وزیر اروپ رائے کے قریبی ہیں۔ بی جے پی کا الزام ہے کہ اسی لیڈر کی شہ پر انتخابات کے بعد بی جے پی کارکنوں پر حملے کیے گئے۔ رپورٹ میں بتایا گیا ہے کہ بڑے کے خلاف ماضی میں بھی کئی غیر قانونی سرگرمیوں کے الزامات لگ چکے ہیں۔ تقریباً تین سال قبل رام نومی کے جلوس پر حملے میں ملوث ہونے کے الزام میں قومی تحقیقاتی ایجنسی (NIA) نے انہیں گرفتار بھی کیا تھا۔

Source: PC-anandabazar