ہری رام پور میں زمین کے تنازع پر ایک خاتون کے ساتھ مبینہ اجتماعی زیادتی

مغربی بنگال کے ضلع جنوبی دینا پور کے ہری رام پور میں زمین کے تنازع پر ایک خاتون کے ساتھ مبینہ اجتماعی زیادتی کا سنگین واقعہ سامنے آیا ہے۔ اس واقعے نے ریاست میں سیاسی درجہ حرارت بڑھا دیا ہے اور مرکزی وزیر مملکت سکانت مجمدار نے ریاستی حکومت کو سخت تنقید کا نشانہ بنایا ہے۔ متاثرہ خاتون کے خاندان نے حال ہی میں اپنے گھر کی تعمیر شروع کی تھی۔ پڑوسیوں نے الزام لگایا کہ وہ ان کی زمین پر قبضہ کر رہے ہیں۔ خاتون کا دعویٰ ہے کہ انہوں نے متنازع جگہ چھوڑ کر کام جاری رکھا تھا۔متاثرہ خاتون کے مطابق، 26 تاریخ کی رات پولیس ان کے گھر آئی اور پڑوسیوں کے دباو پر ان کے شوہر کو حراست میں لے لیا۔خاتون کا الزام ہے کہ شوہر کے جانے کے بعد، پانچ پڑوسیوں نے انہیں اکیلا پا کر اغوا کیا، مار پیٹ کی اور ایک سنسان جگہ لے جا کر ان کے ساتھ اجتماعی زیادتی کی۔ ملزمان انہیں وہیں چھوڑ کر فرار ہو گئے۔سکانت مجمدار نے دعویٰ کیا ہے کہ اس گھناو¿نے جرم میں ملوث افراد کا تعلق ترنمول کانگریس سے ہے۔ انہوں نے ریاست میں خواتین کی حفاظت پر سوالیہ نشان اٹھایا ہے۔ ترنمول کانگریس نے ان الزامات کو مسترد کرتے ہوئے کہا ہے کہ انتخابات کے قریب پارٹی کو بدنام کرنے کی کوشش کی جا رہی ہے۔ مقامی قیادت کا کہنا ہے کہ قانون اپنا کام کرے گا۔مقامی لوگوں نے خاتون کو تشویشناک حالت میں ہسپتال پہنچایا۔ علاج کے بعد انہوں نے ہری رام پور تھانے میں شکایت درج کرائی ہے۔پولیس نے تفتیش شروع کر دی ہے، تاہم ابھی تک کسی کی گرفتاری عمل میں نہیں آئی۔ ایف آئی آر میں درج تاریخ اور وقت کے حوالے سے کچھ تضادات سامنے آئے ہیں، جن کی پولیس باریک بینی سے جانچ کر رہی ہے۔

Source: PC- sangbadpratidin