گیانیشن کمار نے ڈریک و برائن کو گیٹ لوسٹ کہہ کر کمیشن سے باہر نکال دیا

نئی دہلی میں الیکشن کمیشن کے ہیڈ کوارٹر میں کمیشن کے فل بنچ اور ترنمول کانگریس کے وفد کے درمیان ہونے والی ملاقات نے دارالحکومت کی سیاست کو گرما دیا ہے۔ ترنمول وفد کے رکن اور رکن پارلیمنٹ ڈیرک او برائن نے دعویٰ کیا ہے کہ چیف الیکشن کمشنر گیانیش کمار نے انہیں 'گیٹ لوسٹ' کہہ کر کمیشن سے باہر نکال دیا۔ اگرچہ کمیشن نے اس دعوے پر براہ راست کچھ نہیں کہا، لیکن جوابی طور پر یہ الزام لگایا کہ ترنمول وفد کے ارکان اندر چیخ و پکار اور ہنگامہ کر رہے تھے۔ ووٹر لسٹ سے 27 لاکھ سے زائد ناموں کے اخراج کے حوالے سے کمیشن کی جانب سے منگل کو جاری کردہ اعداد و شمار کے بعد ترنمول نے چیف الیکشن کمشنر سے ملاقات کا فیصلہ کیا تھا۔ اسی مناسبت سے بدھ کی صبح 10 بجے ترنمول کا چار رکنی وفد کمیشن کے ہیڈ کوارٹر پہنچا، تاہم وہ کچھ ہی دیر میں باہر نکل آئے۔ ڈیرک او برائن کا کہنا ہے کہ گیانیش کمار نے انہیں وہاں سے نکل جانے کو کہا۔ دوسری طرف، کمیشن کے ذرائع کے مطابق، گیانیش کمار نے ڈیرک کو میٹنگ کے دوران تحمل اور شائستگی برقرار رکھنے کی تلقین کی تھی۔ کمیشن کے دفتر سے باہر نکل کر ترنمول نے الزام لگایا کہ وہ میٹنگ میں چھ اہم نکات اٹھانا چاہتے تھے، لیکن بات شروع ہوتے ہی انہیں باہر جانے کو کہہ دیا گیا۔ ڈیرک او برائن نے چیف الیکشن کمشنر کو خبردار کرتے ہوئے کہا، "وہ نہیں جانتے کہ وہ کس کے ساتھ کھیل رہے ہیں، یہ ممتا بنرجی اور ابھیشیک بنرجی کی ترنمول ہے۔" انہوں نے مزید دعویٰ کیا کہ میٹنگ میں کوئی بامعنی بات چیت نہیں ہوئی اور کمشنر صرف اپنی ہی بات کر رہے تھے۔ الیکشن کمیشن نے واضح کیا ہے کہ وہ اس بار خوف سے پاک اور پرامن انتخابات کروانے کے لیے پرعزم ہے۔

Source: PC-anandabazar