انتخابات سے قبل سروے کے نام پر ضلع میں بیرونی افراد کی آمد و رفت ہگلی میں اتر پردیش کا نوجوان گرفتار

کولکاتا17فروری :آپ ریاست کے اگلے وزیر اعلیٰ کے طور پر کسے دیکھنا چاہتے ہیں؟ آپ کے علاقے کے ایم ایل اے کی کارکردگی کیسی ہے؟ آپ کسے ووٹ دینا چاہتے ہیں؟"—گھر گھر جا کر اس طرح کے سوالات کرنے والے ایک نوجوان کو ہوغلی کی پولیس نے گرفتار کر لیا ہے۔ نیلے رنگ کی پتلون اور ہلکے گلابی رنگ کی قمیض پہنے، گلے میں شناختی کارڈ لٹکائے اس نوجوان کو دیکھ کر مقامی لوگوں کو شک ہوا۔ یہ واقعہ ہوغلی کے دیوانند پور گرام پنچایت علاقے میں پیش آیا، جہاں فرضی شناخت کے ساتھ عوامی سروے کرنے کے الزام میں منگل کو اس نوجوان کو پکڑا گیا۔ تفتیش میں معلوم ہوا ہے کہ گرفتار نوجوان اتر پردیش کا رہنے والا ہے۔ تفتیشی افسران اس بات کی جانچ کر رہے ہیں کہ اسے اسمبلی انتخابات سے قبل اس طرح کا سروے کرنے کے لیے مغربی بنگال کس نے بھیجا ہے اور وہ کس کے لیے کام کر رہا ہے۔ واضح رہے کہ وزیر اعلیٰ ممتا بنرجی نے خود خدشہ ظاہر کیا تھا کہ انتخابات کے قریب ریاست میں بیرونی افراد کی آمد و رفت بڑھ رہی ہے، جو پرامن ماحول کو بگاڑنے کی سازش ہو سکتی ہے۔ انہوں نے سرحدی علاقوں میں پولیس کو کڑی نگرانی کی ہدایت بھی دی تھی۔ ہوغلی کا یہ واقعہ اس خدشے کو سچ ثابت کرتا نظر آ رہا ہے۔ مقامی باشندوں کے مطابق، اتوار کے روز یہ نوجوان اچانک علاقے میں نمودار ہوا اور صبح سے ہی مختلف گھروں، دکانوں اور چائے کے ہوٹلوں پر جا کر انتخابی سروے کے نام پر معلومات جمع کرنے لگا۔ اس کے شناختی کارڈ پر ایک کنسلٹنگ کمپنی کا نام درج تھا اور وہ تمام معلومات ایک موبائل ایپ میں درج کر رہا تھا۔

Source: PC- sangbadpratidin