انتخابی مہم کے طو رپر خواتین میں سیندور کے ڈبے بانٹے جارہے ہیں

بانکڑا میں خواتین کے ووٹ حاصل کرنے کے لیے ترنمول کانگریس نے ایک منفرد مہم شروع کی ہے جسے مقامی حلقوں میں ’سیندور کی سیاست‘ کہا جا رہا ہے۔ مغربی بنگال اسمبلی انتخابات کے پیشِ نظر پارٹی کی یہ حکمت عملی کافی بحث کا مرکز بنی ہوئی ہے۔ بانکڑا اسمبلی حلقہ کے مختلف علاقوں جیسے کینجاکوڑا اور مانکانالی میں یہ مہم زور و شور سے جاری ہے۔ترنمول کانگریس کے کارکنان گھر گھر جا کر خواتین کو سیندور کی ڈبیاں بانٹ رہے ہیں۔ان سیندور کی ڈبیوں پر ترنمول کے امیدوار ڈاکٹر انوپ منڈل کی تصویر لگی ہوئی ہے۔چائے کی دکانوں سے لے کر محلے کے نکڑ تک اب صرف یہی چرچا ہے کہ "ماتھے پر بندیا سجے گی یا ووٹ کی بندیا؟" ترنمول اس مہم کے ذریعے خواتین کو اپنی طرف مائل کرنے کی کوشش کر رہی ہے:سیندور تقسیم کرنے کے ساتھ ساتھ کارکنان 'لکشمی بھنڈار' جیسے خواتین کے لیے مخصوص حکومتی منصوبوں کے فوائد بھی گنوا رہے ہیں۔ امیدوار انوپ منڈل کا کہنا ہے کہ یہ کوئی لالچ نہیں بلکہ عوام کے ساتھ رشتوں کو مضبوط کرنے اور خواتین کے تئیں احترام ظاہر کرنے کا ایک طریقہ ہے۔ جہاں ترنمول اسے "رشتوں کا بندھن" قرار دے رہی ہے، وہیں مخالف جماعتیں اسے انتخابی ضابطہ اخلاق کی خلاف ورزی اور مذہبی علامات کا سیاسی استعمال قرار دے کر تنقید کر رہی ہیں۔ تاہم، دیہی علاقوں میں اس انوکھی مہم نے خواتین ووٹرز کی توجہ ضرور حاصل کی ہے۔

Source: PC-sangbadpratidin