ای ڈی نے روز ویلی گھوٹالے کے متاثرین کو 127.69 کروڑ روپے کی واپسی میں مدد دی

نئی دہلی، 27 اپریل :) انفورسمنٹ ڈائریکٹوریٹ (ای ڈی) کے کولکاتا دفتر نے اثاثہ جات ڈسپوزل کمیٹی (اے ڈی سی) کے ساتھ مل کر روز ویلی گروپ گھوٹالے کے متاثرین کو معاوضہ دلانے کے عمل میں اہم کردار ادا کرتے ہوئے 1,73,350 متاثرین کو 127.69 کروڑ روپے جاری کیے ہیں۔ روز ویلی گروپ نے مغربی بنگال، آسام، اڈیشہ اور دیگر ریاستوں کے سرمایہ کاروں سے زیادہ منافع کا لالچ دے کر دھوکہ دہی کے ذریعے تقریباً 17,520 کروڑ روپے جمع کیے تھے ، جن میں سے 6,666 کروڑ روپے اب تک سرمایہ کاروں کو واپس نہیں کیے گئے ہیں۔ ای ڈی نے 2014 میں تحقیقات شروع ہونے کے بعد سے روز ویلی گروپ کی جائیدادوں کا سراغ لگانے ، انہیں ضبط کرنے ، قرق کرنے اور محفوظ رکھنے کے لیے اقدامات کیے ہیں۔ اب تک ای ڈی مغربی بنگال، اڈیشہ، آسام اور تریپورہ سمیت مختلف ریاستوں میں تقریباً 1,568 کروڑ روپے کی منقولہ اور غیر منقولہ جائیدادوں کو ضبط یا قرق کر چکی ہے ، جس کا مقصد متاثرین کو زیادہ سے زیادہ معاوضہ فراہم کرنا ہے ۔ معاوضے کی ادائیگی کے عمل میں ایک بڑی پیش رفت 22 اپریل 2025 کو ہوئی، جب ای ڈی نے بھونیشور کی خصوصی عدالت کے احکامات کے بعد اے ڈی سی کو 517.54 کروڑ روپے کا ڈیمانڈ ڈرافٹ حوالے کیا۔ اس اقدام سے جرم سے حاصل شدہ قرق شدہ رقم کو متاثرین کے فائدے کے لیے استعمال کرنا ممکن ہو سکا۔

Source: UNI NEWS