زچگی کے دن ہی ایس آئی آر کی سماعت کے لیے بلاوا،حاملہ خاتون پریشان

کولکاتا2جنوری :ڈاکٹر نے زچگی کی ممکنہ تاریخ (ڈیو ڈیٹ) بتائی تھی، لیکن الیکشن کمیشن نے حاملہ خاتون کو ٹھیک اسی دن ایس آئی آر کی سماعت میں حاضر ہونے کی ہدایت دے دی۔ اس صورتحال میں مرشد آباد کی کاندی میونسپلٹی کے وارڈ نمبر 14 کی رہائشی پوتل داس اور ان کا خاندان سخت خوف زدہ ہے۔ خاندان اس الجھن میں ہے کہ پہلے بچے کی پیدائش کی فکر کریں یا ووٹر لسٹ میں نام برقرار رکھنے کے لیے حاضری دیں۔ اسی طرح کی صورتحال مرشد آباد کے کاندی بلاک کی مہالندی پنچایت میں بھی ہے، جہاں 71 سالہ مفلوج اور بستر پر پڑی مقصورہ بی بی کو سماعت کے مرکز پر حاضر ہونے کو کہا گیا ہے۔ جمعہ کے روز تقریباً 40 کلومیٹر دور سماعت کے مرکز پر حاضری کی خبر سن کر دونوں خاندان سخت پریشان ہیں۔ ترنمول کانگریس نے ان دونوں واقعات پر الیکشن کمیشن کی ناقص منصوبہ بندی کو ذمہ دار ٹھہرایا ہے اور کہا ہے کہ مقامی ایم ایل اے اور میونسپلٹی کی جانب سے ان شہریوں کی مدد کی جا رہی ہے۔ پوتل کے شوہر باپنا داس، جو ایک چھوٹے تاجر ہیں، نے بتایا کہ ان کی اہلیہ کو جمعرات کو بلوایا گیا تھا لیکن جسمانی حالت کی وجہ سے وہ نہیں جا سکیں۔ اب انہیں دوبارہ منگل کو بلایا گیا ہے، جبکہ وہی ان کی زچگی کی تاریخ ہے۔ باپنا نے کہا، "ڈاکٹر نے انہیں خوش رہنے کو کہا تھا، لیکن نوٹس آنے کے بعد سے سب کے چہروں سے خوشی غائب ہو گئی ہے۔ اس حالت میں وہ مرکز کیسے جائیں گی؟ اور اگر نہ گئیں تو کیا ہوگا؟ اس فکر نے ہمیں پاگل کر دیا ہے۔" حاملہ پوتل داس کا کہنا ہے کہ، "اس حالت میں گھنٹوں لائن میں کھڑے رہنا میرے لیے ناممکن ہے۔ میں واقعی نہیں جانتی کہ کیا ہوگا۔

Source: PC- anandabazar