دروازہ توڑتے ہی ماں بیٹی کی حالت دیکھ کر پڑوسی دنگ رہ گئے

راناگھاٹ2جنوری : اپنی تین سالہ بیٹی کا گلا گھونٹ کر قتل کرنے کے بعد ماں نے خودکشی کرنے کی کوشش کی۔ جمعہ کی صبح نادیہ کے کوپرز کیمپ علاقے کے وارڈ نمبر 6 میں یہ لرزہ خیز واقعہ پیش آیا، جس سے علاقے میں شدید سنسنی پھیل گئی۔ فی الوقت مذکورہ خاتون تشویشناک حالت میں راناگھاٹ اسپتال میں زیر علاج ہے۔ مقامی اور پولیس ذرائع کے مطابق اس خاتون کا شوہر ملازمت کے سلسلے میں دہلی میں رہتا ہے اور وہ گھر میں اپنی بیٹی کے ساتھ اکیلی رہتی تھی۔ جمعہ کی صبح طویل وقت تک گھر کا دروازہ بند دیکھ کر پڑوسیوں کو شک ہوا۔ پکارنے پر بھی کوئی جواب نہ ملنے پر انہوں نے کھڑکی سے جھانکنے کی کوشش کی۔ کھڑکی کھلتے ہی دیکھا گیا کہ ماں اور بچہ کمرے کے فرش پر بے ہوش پڑے ہیں اور چھت کے پنکھے سے ایک اوڑھنی لٹک رہی ہے۔ اس کے بعد پڑوسیوں نے دروازہ توڑ کر فوری طور پر دونوں کو راناگھاٹ اسپتال پہنچایا، جہاں ڈیوٹی پر موجود ڈاکٹروں نے 3 سالہ بچی کو مردہ قرار دے دیا۔ خاتون کی حالت نازک ہونے کی وجہ سے انہیں اسپتال میں داخل کر لیا گیا ہے۔ راناگھاٹ تھانے کی پولیس نے واقعے کی تحقیقات شروع کر دی ہیں۔ پولیس کی ابتدائی تفتیش کے مطابق خاتون نے پہلے اپنے بچے کا گلا گھونٹ کر قتل کیا اور پھر اوڑھنی کے ذریعے چھت کے پنکھے سے لٹک کر خودکشی کی کوشش کی، لیکن اوڑھنی پھٹ جانے یا کسی طرح پنکھے سے کھل جانے کی وجہ سے ان کی جان بچ گئی۔

Source: PC- tv9bangla