کمیشن کی جانب سے ابھیشیک اور روجیرا کی گاڑیوں کی تلاشی کی ہدایت

انتخابات سے عین قبل اب کمیشن نے ترنمول کے آل انڈیا جنرل سکریٹری ابھیشیک بنرجی اور ان کی اہلیہ کی گاڑیوں کی تلاشی لینے کی ہدایت دے دی ہے! ترنمول کی جانب سے واٹس ایپ میسج کا ایک اسکرین شاٹ شیئر کرتے ہوئے یہ الزام لگایا گیا ہے۔ ان کا کہنا ہے کہ بی جے پی اپنی شکست یقینی دیکھ کر انتقامی سیاست پر اتر آئی ہے۔ رواں ماہ ریاست میں اسمبلی انتخابات ہونے جا رہے ہیں، جس کی وجہ سے اس وقت امن و امان کی ذمہ داری الیکشن کمیشن کے کندھوں پر ہے۔ پرامن انتخابات کے لیے کمیشن نے پہلے ہی پولیس اور انتظامیہ میں کئی تبدیلیاں کی ہیں، جس پر تنازع بھی کھڑا ہوا ہے۔ اسی دوران کمیشن کا ایک واٹس ایپ پیغام منظر عام پر آیا ہے۔ اس چیٹ میں دعویٰ کیا گیا ہے کہ ہیلتھ کیمپوں کے نام پر رقم منتقل کی جا رہی ہے۔ اس بنیاد پر سپریمو ممتا بنرجی کے علاوہ ترنمول کے تمام لیڈروں اور وزرائ کی گاڑیوں کی تلاشی لینے کی ہدایت دی گئی ہے۔ پیغام میں ابھیشیک بنرجی اور روجیرا کا نام خاص طور پر درج کیا گیا ہے اور واضح طور پر کہا گیا ہے کہ ان دونوں کی گاڑیاں کسی بھی صورت میں چیکنگ سے بچنی نہیں چاہئیں۔ اس میسج کا اسکرین شاٹ دکھاتے ہوئے ترنمول نے کمیشن کو سخت تنقید کا نشانہ بنایا ہے۔

Source: PC-sangbadpratidin