چناﺅ سے قبل بھانگڑ کا علاقہ ایک بار پھر میدانِ جنگ بن گیا ہے

یہ واقعہ بھانگڑ بلاک نمبر 1 کے 'بڑالی ماجھر پاڑہ' علاقے میں پیش آیا۔ تنازع کی بنیاد انتخابی مہم کے لیے دیواروں پر تحریر بنی، جس پر دونوں جماعتوں کے کارکنوں میں تلخ کلامی ہوئی۔آئی ایس ایف کارکنوں کا دعویٰ ہے کہ اتوار کی رات انتخابی مہم کے بعد وہ کھانے پینے کا انتظام کر رہے تھے کہ اچانک ترنمول کارکنوں نے ان پر حملہ کر دیا۔ ترنمول نے ان الزامات کی تردید کرتے ہوئے جوابی حملے کا الزام عائد کیا ہے۔ تصادم میں کئی آئی ایس ایف کارکن شدید زخمی ہوئے جنہیں 'نلموڑی بلاک ہسپتال' منتقل کیا گیا۔ ایک کارکن کی حالت تشویشناک ہونے کے باعث اسے کولکتہ کے ہسپتال ریفر کر دیا گیا ہے۔ واقعے کی اطلاع ملتے ہی بھانگڑ تھانے کی پولیس نے موقع پر پہنچ کر صورتحال کو قابو میں کیا۔ علاقے میں تاحال تناو برقرار ہے۔ بھانگڑ اس بار انتخابات کا سب سے ہائی وولٹیج مرکز مانا جا رہا ہے جہاں شوکت مولیٰ اور نوشاد صدیقی کے درمیان براہِ راست اور سخت مقابلہ متوقع ہے۔ سیاسی حلقوں کا کہنا ہے کہ انتخابی مہم کے آغاز میں ہی اس طرح کے تصادم آنے والے دنوں میں مزید کشیدگی کا اشارہ دے رہے ہیں۔

Source: PC- tv9bangla