چیکن نیک‘ کی حفاظت کے لیے بی ایس ایف مزید مستعد، ڈرون اور تھرمل کیمروں سے نگرانی

سلی گوڑی19دسمبر: بنگلہ دیش ایک بار پھر بدامنی کا شکار ہے۔ ’انقلاب منچ‘ کے ترجمان عثمان ہادی کی موت کے بعد کشیدگی نے پرتشدد رخ اختیار کر لیا ہے۔ بنگلہ دیش کے صفِ اول کے اخبار ’پرتھم آلو‘ سمیت کئی دفاتر کو آگ لگانے سے لے کر آدھی رات کو بنگ بندھو (شیخ مجیب) کا گھر مسمار کرنے تک کے واقعات پیش آئے ہیں۔ بنگلہ دیش کی اس تازہ صورتحال پر دہلی گہری نظر رکھے ہوئے ہے۔ صرف یہی نہیں، بلکہ بنگلہ دیش کی اس بدامنی کی آنچ کسی بھی طرح مغربی بنگال تک نہ پہنچے، اس کے لیے بارڈر سیکیورٹی فورس (BSF) انتہائی الرٹ ہے۔ خاص طور پر ’چکنز نیک‘ (Chicken’s Neck) کی حفاظت میں کوئی کسر نہیں چھوڑی جا رہی۔ وہاں کی انتہائی ابتر صورتحال کے پیش نظر جمعرات کی رات سے ہی بھارت-بنگلہ دیش سرحدی علاقوں میں نگرانی مزید سخت کر دی گئی ہے۔عملی طور پر طویل سرحد کے ساتھ واقع ہر آبادی کو سیکیورٹی کے حصار میں لے لیا گیا ہے۔ سرحد پر تھرمل کیمروں، نائٹ ویڑن کیمروں، سی سی ٹی وی کیمروں اور ڈرونز کی مدد سے کڑی نظر رکھی جا رہی ہے۔

Source: PC- sangbadpratidin