’’بی جے پی کے زیرِ اقتدار ریاستوں میں بنگالی مزدوروں پر مظالم…ہم متاثرہ خاندانوں کے ساتھ کھڑے ہیں…‘‘، سی ایم ممتا کا سخت ردِعمل

کولکاتا: مغربی بنگال کی وزیر اعلیٰ ممتا بنرجی نے بی جے پی کے زیرِ اقتدار ریاستوں میں بنگالی بولنے والے لوگوں کے ساتھ مبینہ طور پر ہو رہے مظالم پر سخت ردِعمل ظاہر کیا ہے۔ وزیر اعلیٰ نے کہا کہ بنگالی زبان بولنے والے مہاجر مزدوروں اور ان کے خاندانوں پر ہونے والے حملوں اور ہراسانی کی وہ سخت مذمت کرتی ہیں۔ ساتھ ہی ممتا حکومت دبے کچلے، خوف زدہ اور پریشان بنگالی بولنے والے مہاجر خاندانوں کے ساتھ پوری مضبوطی سے کھڑی ہے۔ وزیر اعلیٰ ممتا بنرجی نے ہفتہ کے روز سوشل میڈیا پلیٹ فارم ایکس پر ایک پوسٹ میں لکھا، ’’ہم بی جے پی کے زیرِ اقتدار ہر ریاست میں بنگالی بولنے والے لوگوں پر ہونے والے سفاکانہ مظالم اور ہراسانی کی سخت مذمت کرتے ہیں۔ ہم دبے کچلے، خوف زدہ اور پریشان بنگالی بولنے والے مہاجر خاندانوں کے ساتھ کھڑے ہیں اور ان خاندانوں کو ہر ممکن مدد فراہم کریں گے۔ انسانی جان کی کوئی قیمت نہیں ہوتی، لیکن اگر موت واقع ہوتی ہے تو ہم نے مالی معاوضہ دینے کا وعدہ کیا ہے۔‘‘ اوڈیشہ میں پیش آئے حالیہ واقعے کا ذکر کرتے ہوئے انہوں نے کہا کہ حال ہی میں بی جے پی کے زیرِ اقتدار ریاست اوڈیشہ میں جنگی پور علاقے کے کچھ مہاجر مزدوروں پر مختلف قسم کے مظالم کیے گئے ہیں۔ یہ نہایت افسوسناک ہے کہ 24 دسمبر کو جنگی پور کے سُتی علاقے سے تعلق رکھنے والے ایک نوجوان مہاجر مزدور کو سنبل پور میں بے رحمی سے پیٹ پیٹ کر قتل کر دیا گیا۔ مرشد آباد کے مہاجر مزدور خوف کے باعث اوڈیشہ سے اپنے گھروں کو لوٹ رہے ہیں۔ اس دل دہلا دینے والے واقعے میں ہم متاثرہ خاندانوں کے ساتھ کھڑے ہیں اور مرنے والے کے خاندان کو ہماری جانب سے مالی امداد بھی فراہم کی جائے گی۔ وزیر اعلیٰ نے ایکس پوسٹ میں آگے لکھا، ’’بی جے پی کے زیرِ اقتدار ریاستوں میں پیش آئے ان تمام واقعات میں ہم قصورواروں کی سخت مذمت کرتے ہیں اور متاثرین کو ہر ممکن مدد فراہم کرنے کا وعدہ کرتے ہیں۔ بنگالی بولنا کوئی جرم نہیں ہو سکتا۔‘‘ وزیر اعلیٰ نے مزید کہا کہ مغربی بنگال پولیس نے جویل رانا کی موت کے معاملے میں پہلے ہی سُتی پولیس اسٹیشن میں زیرو ایف آئی آر درج کر لی ہے اور اب تک 6 افراد کو گرفتار کیا جا چکا ہے۔ میری ریاستی پولیس کی ایک ٹیم تحقیقات کے لیے اوڈیشہ بھیج دی گئی ہے۔

Source: social media