بی ایل او شوہر نے اہلیہ کو تھمایا سماعت کا نوٹس، خود کو بھی جاری کیا, بولے: 'میری غلطی نہیں، قصوروار اے آئی ہے'

ایک اسکول ٹیچر اور بی ایل او شوہر کھانا کھا کر کام پر نکلے تھے۔ دوپہر کے وقت ان کی اہلیہ گھر پر آرام کر رہی تھیں کہ اچانک شوہر ہانپتے کانپتے گھر واپس آئے۔ گھر میں داخل ہوتے ہی انہوں نے اپنی اہلیہ کے ہاتھ میں ایس آئی آر سماعت کا نوٹس تھما دیا، اور ساتھ ہی خود کو بھی ایک نوٹس جاری کیا۔ حیران و پریشان اہلیہ کچھ دیر تک شوہر کو تکتی رہ گئیں۔ شوہر نے سنجیدگی سے بتایا کہ وہ خود بھی کم حیران نہیں ہیں، لیکن یہی حقیقت ہے! اب میاں بیوی دونوں کو الیکشن کمیشن کی جانب سے سماعت کے لیے طلب کیا گیا ہے۔ یہ واقعہ مشرقی بردھوان کے کاٹوا شہر میں پیش آیا۔ واقعے کی تفصیلات: دیوشنکر چٹوپادھیائے مشرقی بردھوان کے کیتوگرام میں ایک پرائمری اسکول میں ٹیچر ہیں۔ وہ اس علاقے کے بوتھ نمبر 165 کے بی ایل او کے طور پر ایس آئی آر کے عمل کی ذمہ داری سنبھال رہے ہیں۔ دیوشنکر کا آبائی گاوں کوڈولا ہے، لیکن وہ طویل عرصے سے کاٹوا شہر کے وارڈ نمبر 10 میں اپنی اہلیہ انندیتا اور اکلوتے بچے کے ساتھ رہ رہے ہیں۔ اب میاں بیوی دونوں کو ایس آئی آر کی سماعت کے لیے بلایا گیا ہے۔نوٹس ہاتھ میں لیے انندیتا کا پہلا سوال کافی دلچسپ تھا۔ انہوں نے کہا: "نوٹس پر لکھا ہے کہ اگر کوئی سوال ہو تو بی ایل او سے رجوع کریں۔ میرے شوہر ہی اس بوتھ کے بی ایل او ہیں، اور نوٹس تو انہیں بھی ملا ہے۔"بی ایل او شوہر نے وضاحت کرتے ہوئے کہا: "الیکشن کمیشن کی مخصوص ایپ پر نوٹس موصول ہوا ہے۔ اس لیے قواعد کے مطابق ہم دونوں کو سماعت میں حاضر ہونا پڑے گا۔ دیگر ووٹرز کی طرح ہمیں بھی لائن میں کھڑا ہونا ہوگا۔"

Source: PC-anandabazar