بی جے پی کارکن کی جانب سے 4 نابالغوں پر بہیمانہ تشدد

اتر دیناج پور کے ڈالکھولا میں ایک لرزہ خیز واقعہ سامنے آیا ہے، جہاں بائیک چوری کے شبہ میں چار نابالغ بچوں کو سڑک پر لٹا کر بے رحمی سے مارا پیٹ گیا۔ اس واقعے نے علاقے میں سیاسی اور سماجی طور پر شدید غم و غصہ پیدا کر دیا ہے۔اتر دیناج پور کے ڈالکھولا میں ایک بی جے پی لیڈر اور تاجر پر الزام لگا ہے کہ انہوں نے بائیک چوری کے 'الزام' میں چار نابالغوں کو سڑک پر گھسیٹ کر بیلٹ سے وحشیانہ طریقے سے مارا پیٹا۔ جمعرات کی رات پیش آنے والے اس واقعے کے خلاف ترنمول کانگریس نے پولیس میں شکایت درج کروا دی ہے۔ ڈالکھولا میونسپلٹی کے وارڈ نمبر 10 میں ایک بائیک شوروم کے قریب چار لڑکوں کو مبینہ طور پر چوری کی نیت سے جمع ہونے کے شبہ میں پکڑا گیا۔ الزام ہے کہ بی جے پی کارکن ارجن سرکار اور ان کے 10-12 ساتھیوں نے ان بچوں کو اپنی گرفت میں لے لیا۔سوشل میڈیا پر ایک ویڈیو وائرل ہوئی ہے (جس کی تصدیق نہیں کی جا سکی) جس میں دیکھا جا سکتا ہے کہ ارجن سرکار ایک نابالغ کو پکڑ کر بیلٹ سے بے دریغ مار رہے ہیں۔چاروں لڑکوں کو علاج کے لیے رائے گنج میڈیکل کالج ہسپتال منتقل کیا گیا ہے۔ بتایا جا رہا ہے کہ ان میں سے ایک کی حالت کافی نازک ہے۔اسلام پور کے ایڈیشنل سپرنٹنڈنٹ آف پولیس ڈینڈوپ شیرپا نے بتایا کہ شکایت موصول ہو چکی ہے اور پولیس نے تحقیقات شروع کر دی ہے۔ مرکزی ملزم کی تلاش جاری ہے اور مقامی لوگوں کے بیانات قلمبند کیے جا رہے ہیں۔ترنمول کانگریس نے اس واقعے کو بی جے پی کی "غنڈہ گردی" قرار دیتے ہوئے پولیس سے سخت کارروائی کا مطالبہ کیا ہے۔مقامی باشندوں کا کہنا ہے کہ اگر وہ بچے چوری کی کوشش کر رہے تھے تب بھی کسی کو قانون ہاتھ میں لینے یا انہیں اس طرح 'ہجومی تشدد' کا نشانہ بنانے کا حق نہیں تھا۔ ان کا موقف ہے کہ بچوں کو پکڑ کر پولیس کے حوالے کیا جانا چاہیے تھا، لیکن جس طرح ان کی پٹائی کی گئی وہ غیر انسانی ہے۔

Source: PC- sangbadpratidin