بنگال میں ہونے والے تشدد کے واقعات سے گیا نیش کمار ناراض ، سخت کارروائی کریں گے

مغربی بنگال میں انتخابات کے بعد ہونے والے تشدد کو روکنے کے لیے ملک کے چیف الیکشن کمشنر گیانیش کمار نے سخت کارروائی کا انتباہ دیا ہے۔ انہوں نے ہدایت دی ہے کہ جہاں بھی توڑ پھوڑ یا تشدد کا واقعہ پیش آئے، وہاں ملوث افراد کو فوری طور پر گرفتار کیا جائے۔چیف الیکشن کمشنر نے ریاست کے چیف سکریٹری، ڈی جی پی، کولکتہ پولیس کمشنر اور سی اے پی ایف کے ڈائریکٹر جنرل کو الرٹ رہنے کا حکم دیا ہے۔ضلع مجسٹریٹس اور پولیس افسران کو ہر وقت کڑی نگرانی رکھنے کی ہدایت دی گئی ہے۔کمیشن نے واضح کیا ہے کہ انتخابی تشدد کے معاملے میں کسی بھی قسم کی کوتاہی برداشت نہیں کی جائے گی۔پیر کو نتائج کے اعلان کے بعد سے ہی ریاست کے مختلف حصوں جیسے بھانگوڑ، باروئی پور، ہاوڑہ اور نانور سے بدامنی کی خبریں موصول ہو رہی ہیں۔ منگل کے روز بھی کئی مقامات پر تصادم جاری رہا۔ ایک طرف ترنمول کارکن کے قتل کا الزام ہے، تو دوسری طرف بی جے پی کارکن کی ہلاکت کی خبر ہے۔ کئی جگہوں پر ترنمول کے پارٹی دفاتر میں توڑ پھوڑ کی گئی ہے۔ترنمول نے ان حملوں کا ذمہ دار بی جے پی کو ٹھہرایا ہے، جبکہ بی جے پی نے ان الزامات کی تردید کی ہے۔ بی جے پی کے ریاستی صدر شمیک بھٹاچاریہ نے چیف سکریٹری سے اپیل کی ہے کہ وہ سیاسی وابستگی دیکھے بغیر تشدد میں ملوث افراد کے خلاف کارروائی کریں۔الیکشن کمیشن کے اس سخت موقف کا مقصد ریاست میں امن و امان کی صورتحال کو بحال کرنا اور مجرموں کے خلاف فوری قانونی کارروائی کو یقینی بنانا ہے۔

Source: PC-anandabazar