ڈائمنڈ ہاربر میں مبصر اجے پال شرما کی پولنگ ڈے سرگرمیاں اور سی آر پی ایف ملاقات پر تنازعہ

کولکاتہ، 29 اپریل : اجے پال شرما پولنگ کے دن صبح سویرے روانہ ہوئے اور ان کا قافلہ شیرکولے کے راستے ڈائمنڈ ہاربر اسٹیشن کے قریب قائم عارضی سی آر پی ایف کیمپ پہنچا۔ صبح تقریباً 7:45 بجے وہ کیمپ پہنچے ۔ اسی دوران سی آر پی ایف کے ڈائریکٹر جنرل گیانندر پرتاپ سنگھ بھی وہاں پہنچ گئے ۔ دونوں افسران، مرکزی ریزرو پولیس فورس کے دیگر سینئر اہلکاروں کے ساتھ تقریباً آدھا گھنٹہ کیمپ کے اندر رہے ، جس کے باعث اہم ووٹنگ کے دن ان کی ملاقات کے مقصد پر مختلف حلقوں میں سوالات اٹھنے لگے ۔ پیر کے روز الیکشن کمیشن آف انڈیا کی جانب سے ڈائمنڈ ہاربر کے لیے شرما کو پولیس مبصر مقرر کیے جانے کے بعد سے وہ تنازعہ کا مرکز بنے ہوئے ہیں۔ ایک ویڈیو کلپ جس کی تصدیق یو این آئی نے آزادانہ طور پر نہیں کی اس نے اس معاملے کو مزید ہوا دی۔ اس ویڈیو میں مبینہ طور پر شرما کچھ افراد کو سخت تنبیہ کرتے نظر آ رہے ہیں۔ دعویٰ کیا گیا کہ یہ ویڈیو فالتہ میں ترنمول کانگریس کے امیدوار جہانگیر خان کی رہائش کے قریب بنائی گئی، جہاں ان کے اہلِ خانہ سے بھی بات کی گئی۔ اس ویڈیو پر آل انڈیا ترنمول کانگریس نے سخت ردعمل ظاہر کرتے ہوئے شرما کے طرزِ عمل پر سوال اٹھائے ۔ منگل کی صبح کشیدگی اس وقت بڑھ گئی جب شرما اور خان آمنے سامنے آئے ۔ جیسے ہی شرما کا قافلہ ایک ترنمول دفتر کے سامنے سے گزرا، مظاہرین جس کی قیادت خان کر رہے تھے ، نے جے بنگلا اور گو بیک کے نعرے لگائے ۔ مزاحمت کے باوجود شرما نے اپنے دورے جاری رکھے اور مرکزی فورسز کے ساتھ پورے حلقے میں گھوم کر زمینی صورتحال کا جائزہ لیتے رہے ۔

Source: UNI NEWS