شوبھندو ادھیکاری کے پی اے کے قتل کی ترنمول کانگریس نے شدید مذمت کی

مدھیم گرام میں شبھیندو ادھیکاری کے پرسنل اسسٹنٹ چندر ناتھ رتھ کے نامعلوم بدمعاشوں کے ہاتھوں قتل کی ترنمول کانگریس نے شدید مذمت کی ہے۔ آل انڈیا ترنمول کانگریس کے آفیشل ایکس (ٹویٹر) ہینڈل پر اس قتل کے ساتھ ساتھ انتخابات کے بعد ہونے والے تشدد میں تین ترنمول کارکنوں کی ہلاکت کی بھی مذمت کی گئی ہے۔ ممتا بنرجی کی پارٹی نے قصورواروں کے لیے سخت ترین سزا کا مطالبہ کیا ہے۔ ہم آج رات مدھیم گرام میں چندر ناتھ رتھ کے وحشیانہ قتل کی شدید مذمت کرتے ہیں۔ اس کے ساتھ ہی، ہم مثالی ضابطہ اخلاق کے نفاذ کے باوجود گزشتہ تین دنوں میں بی جے پی کے حمایت یافتہ بدمعاشوں کے ہاتھوں تین ٹی ایم سی کارکنوں کے قتل کی بھی مذمت کرتے ہیں۔پارٹی نے مزید کہا کہ وہ اس معاملے میں سخت ترین کارروائی کا مطالبہ کرتی ہے، جس میں عدالت کی نگرانی میں سی بی آئی تفتیش بھی شامل ہو، تاکہ ملزمان کی شناخت کر کے انہیں فوری طور پر انصاف کے کٹہرے میں لایا جا سکے۔بدھ کی رات مدھیم گرام کے دوہاریہ علاقے میں چندر ناتھ پر حملہ ہوا۔ موٹر سائیکل پر سوار دو بدمعاشوں نے ان کی گاڑی کو روکا اور اندھا دھند فائرنگ کر کے فرار ہو گئے۔ بتایا گیا ہے کہ موٹر سائیکل پر نمبر پلیٹ نہیں تھی۔ چندر ناتھ کے سینے، پیٹ اور سر میں گولیاں لگیں۔ انہیں فوری طور پر مدھیم گرام کے ویوا سٹی ہسپتال لے جایا گیا، جہاں ڈاکٹروں نے انہیں مردہ قرار دے دیا۔ اس حملے میں گاڑی کا ڈرائیور بھی شدید زخمی ہوا ہے۔

Source: PC-sangbadpratidin