ابھیشیک بنرجی نے راہل گاندھی کے ساتھ ملاقات کی

لوک سبھا میں قائد حزب اختلاف راہل گاندھی اور ترنمول کانگریس (ٹی ایم سی) کے قومی جنرل سکریٹری ابھیشیک بنرجی نے بدھ کو دہلی میں ملاقات کی، جبکہ اپوزیشن کے انڈیا بلاک کی جانب سے بی جے پی کے خلاف ہم آہنگی مضبوط کرنے اور متحدہ محاذ پیش کرنے کی کوششیں جاری ہیں۔ یہ ملاقات ایسے وقت میں ہوئی جب ٹی ایم سی بڑھتی ہوئی اندرونی بے چینی سے دوچار ہے، جس کی علامت راجیہ سبھا رکن سشمیتا دیو کا استعفیٰ ہے۔10 جن پتھ پر ہونے والی یہ ملاقات اس دن کے بعد ہوئی جب ٹی ایم سی کی سپریمو ممتا بنرجی نے سابق کانگریس صدر سونیا گاندھی سے ان کی رہائش گاہ پر ملاقات کی اور اپوزیشن اتحاد کو مزید مستحکم کرنے کے طریقوں پر تبادلہ خیال کیا۔ ذرائع کے مطابق راول اور ابھیشیک کی یہ ملاقات اس ہفتے کے شروع میں دہلی میں ہونے والے انڈیا بلاک اجلاس کے بعد کانگریس اور ٹی ایم سی کے درمیان جاری مصروفیات کا حصہ تھی۔اگرچہ ملاقات کی تفصیلات فوری طور پر دستیاب نہیں ہیں، یہ ایسے وقت میں ہوئی ہے جب اپوزیشن رہنما اتحادی شراکت داروں کے درمیان زیادہ مربوط حکمت عملی کے خواہاں ہیں۔ پیر کو انڈیا بلاک کے اجلاس میں، رہنماوں نے بی جے پی کا مقابلہ کرنے کے لیے اتحاد کی ضرورت پر زور دیا، جہاں ممتا بنرجی نے شراکت داروں سے اختلافات کو ختم کرنے اور عوامی مفاد کے معاملات پر مل کر کام کرنے کی اپیل کی۔ترنمول کانگریس کے لیے ایک تازہ دھچکے میں، راجیہ سبھا رکن سشمیتا دیو نے بدھ کو پارٹی اور ایوان بالا دونوں سے استعفیٰ دے دیا، جو اس ہفتے استعفیٰ دینے والی دوسری ٹی ایم سی رکن بن گئیں۔اس قیاس آرائی کے درمیان کہ وہ بی جے پی میں شامل ہو سکتی ہیں، دیو نے کہا کہ انھوں نے "ذاتی اور سیاسی وجوہات" کی بنا پر استعفیٰ دیا ہے۔ ٍسشمیتا دیو نے پی ٹی آئی ویڈیوز کو بتایا، "جب میں نے آج صبح پارٹی سے استعفیٰ دیا تو ظاہر تھا کہ مجھے راجیہ سبھا کی نشست بھی چھوڑنی ہوگی جو اس پارٹی نے مجھے دی تھی، کیونکہ اسی پارٹی نے مجھے اس کے لیے نامزد کیا تھا۔ لہٰذا، میں نے دونوں سے استعفیٰ دے دیا۔ اس کے بعد، میں نے آسام کے سی ایم ہمنتا بسوا شرما سے ملاقات کی کیونکہ میں آسام میں سیاست کرنا چاہتی ہوں۔ ہمارے درمیان گفتگو ہوئی، لیکن میں اس وقت ٹیلی ویڑن پر ان پر تبصرہ نہیں کر سکتی۔ جب مناسب وقت ہوگا، میں آپ کو ضرور بتاوں گی۔ جب انھوں نے ٹی ایم سی سربراہ ممتا بنرجی یا اپنے مستقبل کے سیاسی منصوبوں پر تبصرہ کرنے سے انکار کر دیا، تو دیو نے کہا، "یہ میرا انفرادی فیصلہ ہے کہ میں کس قسم کی سیاست کرنا چاہتی ہوں اور میرا لیڈر کون ہونا چاہیے۔ میرے اپنے وجوہات ہیں اور اسی لیے میں نے اپنا فیصلہ کیا ہے۔بی جے پی میں شامل ہونے کی اطلاعات پر انھوں نے کہا، "جب میں کوئی فیصلہ کروں گی تو آپ کو بتا دوں گی۔" انھوں نے مزید کہا کہ انھوں نے ذاتی اور سیاسی وجوہات کی بنا پر استعفیٰ دیا ہے اور "ہر کسی کو اپنا ارادہ بدلنے کا حق ہے، اور یہ فیصلہ کرنے کا کہ وہ کس قسم کی سیاست کرنا چاہتے ہیں۔"دیو، جو کچھ سال قبل ٹی ایم سی میں شامل ہونے والی سابق کانگریس رہنما تھیں، نے راجیہ سبھا کے چئیرمین سی پی رادھا کرشنن سے ملاقات کی اور اپنا استعفیٰ پیش کیا۔اپنے استعفے کے خط میں دیو نے لکھا، "میں اس کے ذریعے راجیہ سبھا کی رکنیت سے استعفیٰ دیتی ہوں، جسے فوری اثر سے قبول کیا جائے۔"چیئرمین کے نام خط میں انھوں نے کہا، "میں آپ کی عزت مآب، ڈپٹی چیئرمین اور راجیہ سبھا سیکریٹریٹ کے تمام عہدیداروں کا اپنی راجیہ سبھا کی رکنیت کے دوران تمام تر مدد اور تعاون کے لیے مخلصانہ شکریہ ادا کرتی ہوں۔ یہ استعفے مغربی بنگال کے حالیہ اسمبلی انتخابات میں شکست کے بعد ٹی ایم سی کے اندر بے چینی کے آثار کے درمیان آئے ہیں۔ ذرائع کے مطابق، پارٹی کے کئی ارکان اسمبلی ایک علیحدہ گروپ بنانے اور حکمران این ڈی اے کے ساتھ اتحاد کرنے پر غور کر رہے ہیں۔ترنمول کے 80 میں سے اکثر ایم ایل اے پہلے ہی رتربھرا بنرجی کی قیادت میں ایک علیحدہ گروپ بنا چکے ہیں، جو ریاستی اسمبلی میں قائد حزب اختلاف کے طور پر ابھرے ہیں۔

Source: PC-telegraphindia.com