چار تاریخ کے بعد پانی دینے والا بھی کوئی نہیں بچے گا: یوگی کی دھمکی

اتر پردیش کے وزیر اعلیٰ یوگی آدتیہ ناتھ نے کوچ بہار میں ایک انتخابی ریلی کے دوران ترنمول کانگریس پر سخت لفظی حملہ کیا ہے اور "بلڈوزر" سیاست کا حوالہ دیتے ہوئے سنگین نتائج کی وارننگ دی ہے۔یوگی آدتیہ ناتھ نے کہا کہ اگر ترنمول کے لوگ دھمکیاں دیتے رہے تو 4 مئی (انتخابی نتائج کا دن) کے بعد ان کی الٹی گنتی شروع ہو جائے گی۔ انہوں نے متنازعہ بیان دیتے ہوئے کہا، "4 تاریخ کے بعد پانی دینے والا بھی کوئی نہیں بچے گا۔" انہوں نے اعلان کیا کہ اگر بنگال میں بی جے پی کی حکومت آتی ہے تو یوپی کی طرز پر یہاں بھی بدمعاشوں اور مافیاوں پر بلڈوزر چلے گا۔ انہوں نے کہا، "یوپی میں ہم نے مافیاوں پر بلڈوزر چلا کر ان کی ہڈیوں سے ایکسپریس وے بنا دیے ہیں۔" یوگی نے دعویٰ کیا کہ ترنمول کے 15 سالہ دور میں بنگال میں 7000 کارخانے بند ہوئے اور 30 لاکھ نوجوان بے روزگار ہو گئے۔ انہوں نے الزام لگایا کہ مودی حکومت جو پیسہ بنگال بھیجتی ہے، وہ عام لوگوں تک نہیں پہنچتا بلکہ ترنمول کے "غنڈوں اور دراندازوں" کی جیب میں چلا جاتا ہے۔ انہوں نے ٹی ایم سی پر مسلمانوں کی خوشنودی کی سیاست کرنے کا الزام لگایا۔یوگی نے کہا کہ کانگریس، ایس پی اور ٹی ایم سی جیسی جماعتیں ایودھیا میں رام مندر کی تعمیر کو نہیں روک سکیں۔ انہوں نے الزام لگایا کہ بنگال میں رام کا نام لینے پر پابندی ہے اور درگا پوجا کے وسرجن (مورتیوں کو ٹھنڈا کرنے) کے لیے اجازت نہیں دی جاتی۔لوک سبھا میں خواتین کے تحفظ کے بل کی ناکامی پر انہوں نے بائیں بازو، کانگریس اور ترنمول کو مشترکہ طور پر ذمہ دار ٹھہرایا۔

Source: PC-sangbadpratidin