سری لنکا میں سیلاب اور بارشوں سے 153 ہلاکتیں، ایمرجنسی نافذ

سری لنکا میں سائیکلون ڈٹواہ کے باعث شدید بارشوں اور سیلاب سے ہلاکتوں کی تعداد 153 تک پہنچ گئی اور سنیچر کو ملک میں ایمرجنسی نافذ کر دی گئی ہے۔ فرانسیسی نیوز ایجنسی اے ایف پی کے مطابق 191 افراد تاحال لاپتہ ہیں۔ ڈیزاسٹر مینجمنٹ سینٹر (ڈی ایم سی) کے مطابق اس شدید موسم نے 20 ہزار سے زائد گھروں کو تباہ کر دیا ہے اور ایک لاکھ آٹھ ہزار افراد کو سرکاری عارضی پناہ گاہوں میں منتقل کر دیا گیا ہے۔ صدر انورا کمارا ڈیسنايکے نے ایمرجنسی قوانین نافذ کیے جس سے انہیں جزیرے پر ایک ہفتے سے جاری طوفانی بارشوں کے بعد تباہی سے نمٹنے کے لیے وسیع اختیارات حاصل ہو گئے ہیں۔ ڈی ایم سی کے ڈائریکٹر جنرل سمپت کوٹویگوڈا نے کہا کہ ’ہمارے پاس 153 ہلاکتوں کی تصدیق ہو چکی ہے اور مزید 191 افراد لاپتہ ہیں۔‘ انہوں نے مزید بتایا کہ امدادی کارروائیوں کو فوج، بحریہ اور فضائیہ کی تعیناتی کرکے تیز کر دیا گیا ہے۔ فوج نے سنیچر کو 69 بس مسافروں کو بچایا جن میں ایک جرمن سیاح بھی شامل تھا، جو انورادھاپورا ضلع میں پھنس گئے تھے۔ یہ کارروائی ہیلی کاپٹر اور بحری کشتیوں کے ذریعے 24 گھنٹے تک جاری رہی۔ ایک مسافر نے مقامی ہسپتال میں صحافیوں سے بات کرتے ہوئے کہا کہ بحریہ کے اہلکاروں نے انہیں رسیوں کی مدد سے سیلابی پانی عبور کروا کر قریبی گھر کی چھت پر چڑھنے میں مدد دی۔ شانتا نے کہا کہ ’ہم بہت خوش قسمت تھے، جب ہم چھت پر تھے تو اس کا ایک حصہ گر گیا اور تین خواتین پانی میں گر گئیں، لیکن انہیں دوبارہ چھت پر چڑھا لیا گیا۔‘ انہوں نے بتایا کہ ہیلی کاپٹر کو ابتدائی ریسکیو کوشش منسوخ کرنا پڑی کیونکہ اس کے پنکھوں کی ہوا چھت کو اڑا دینے کا خطرہ پیدا کر رہی تھی۔ بعد میں انہیں بحری کشتیوں کے ذریعے بچایا گیا۔

Source: social media