سابق وزیر شری پرکاش جیسوال نہیں رہے، منموہن سنگھ حکومت میں کوئلے کے وزیر تھے

کانپور، اتر پردیش سے سابق ممبر پارلیمنٹ شری پرکاش جیسوال کا انتقال ہو گیا ہے۔ انہوں نے 81 سال کی عمر میں آخری سانس لی۔وہ کافی عرصے سے علیل تھے۔ 28 نومبر جمعہ کو ان کی طبیعت بگڑنے پر انہیں کانپور کے کارڈیالوجی اسپتال لے جایا گیا جہاں ڈاکٹروں نے انہیں مردہ قرار دیا۔ شری پرکاش جیسوال ڈاکٹر منموہن سنگھ کی مرکزی حکومت میں وزیر کوئلہ اور وزیر داخلہ بھی رہ چکے ہیں۔ شری پرکاش جیسوال اتر پردیش کے کانپور لوک سبھا حلقہ سے چار بار رکن رہے ۔ وہ انڈین نیشنل کانگریس کے سینئر رہنما تھے اور متحدہ ترقی پسند اتحاد (یو پی اے) حکومت میں اہم کردار ادا کرتے تھے۔ انہوں نے 2009 سے 2014 تک مرکزی وزیر کوئلہ اور 2004 سے 2009 تک وزیر مملکت برائے امور داخلہ کے طور پر خدمات انجام دیں۔ ان کی موثر انتظامیہ اور پارلیمانی بحثوں کے لیے ایوان میں ان کا ہمیشہ احترام کیا جاتا تھا۔ 25 ستمبر 1944 کو کانپور میں پیدا ہونے والے شری پرکاش جیسوال نے اپنے سیاسی کیریئر کا آغاز مقامی سطح سے کیا۔ انہوں نے شہر کانگریس کمیٹی کے صدر اور ریاستی کانگریس کمیٹی کے جوائنٹ سکریٹری کے طور پر خدمات انجام دیں۔ وہ پہلی بار 1990 کی دہائی میں کانپور سے لوک سبھا پہنچے اور اس کے بعد 1996، 2004 اور 2009 میں لگاتار منتخب ہوئے۔ کوئلہ وزارت میں رہتے ہوئے، انہوں نے علاقائی ترقی پر خصوصی زور دیا، جبکہ وزارت داخلہ میں داخلی سلامتی اور امن و امان کے مسائل پر ان کی سرگرمی قابل تعریف تھی۔ جیسوال جو طویل عرصے سے صحت کے مسائل سے دوچار تھے، گزشتہ کچھ دنوں سے ان کی حالت تشویشناک ہوگئی تھی۔ اہل خانہ کے مطابق صبح سے ان کی طبیعت کافی بگڑ گئی تھی اور شام کو دیر گئے انہیں کارڈیالوجی اسپتال لے جایا گیا ۔ وہاں پہنچنے پر ڈاکٹروں نے معائنہ کرنے کے بعد ان کی موت کی تصدیق کر دی۔ موت کی بنیادی وجہ دل کی پیچیدگیاں بتائی جارہی ہیں۔

Source: social media