وہ وقت دور نہیں جب مسلم اور غیرمسلم افغانستان سے دہشتگردی ختم کرنے کیلئے ایک ہو جائیں گے: پاکستان کے نائب وزیراعظم اسحاق ڈار

پاکستان کے نائب وزیراعظم و وزیر خارجہ اسحاق ڈار نے افغانستان کی سرزمین سے پاکستان میں ہونے والے حملوں پر بات کرتے ہوئے کہا ہے کہ ’وہ وقت دور نہیں جب مسلم اور غیرمسلم دہشت گردی کو ختم کرنے کے لیے اکٹھے ہو جائیں گے۔‘ سنیچر کو اسلام آباد میں پریس کانفرنس کرتے ہوئے ان کا کہنا تھا کہ ’چین کے ساتھ کیا ہوا ہے، امریکہ میں کیا ہوا ہے۔ وہ وقت دور نہیں جب مسلم اور غیرمسلم دہشت گردی کو ختم کرنے کے لیے اکٹھے ہو جائیں گے۔ اس سے بہتر نہیں ہے کہ ہم مل کر اپنے خطے کو دہشت گردی سے پاک کر لیں۔‘ افغانستان میں موجود شدت پسند گروہوں کے حوالے سے انہوں نے کہا کہ ’میں نے افغانستان کی قیادت سے کہا تھا کہ آپ نے مسئلہ حل نہ کیا تو یہ آپ کے لیے بھی مصیبت بن جائیں گے اور وہ وقت دور نہیں ہے۔ ان کو اب اپنی پالیسی کو تبدیل کرنا چاہیے۔‘ اسحاق ڈار نے کہا کہ ’میں نے خلوص نیت سے افغانستان کے تین دورے کیے اور تعلقات بہتر کرنے کی کوشش کی کیونکہ افغانستان ہمارا ہمسایہ اور مسلمان ملک ہے۔ لیکن جب ہمارے شہیدوں کے جنازے اٹھ رہے ہیں تو اب ہم کیسے آنکھیں بند رکھیں۔‘ وزیر خارجہ نے کہا کہ ’یہ ان کی خام خیالی ہے کہ چیزیں ٹھیک نہیں ہو سکتیں۔ ہم فوجی ایکشن کر سکتے ہیں، لیکن یہ بھی ٹھیک نہیں ہے کہ بھائی کے گھر جا کر اور اندر جا کر گھس کر ماریں اور ان عناصر کو نکالیں۔ نکالنا کوئی مسئلہ نہیں ہے۔ اگر ہم انڈیا کو سبق سکھا سکتے ہیں تو یہ کوئی مسئلہ نہیں ہے۔‘ ’اس طرف بات جا رہی تھی جب یہ مسئلہ شروع ہوا۔ قطر ہمارے ساتھ رابطہ کر رہا تھا۔ ان کو پتہ چل گیا تھا کہ ہم کنیٹک ایکشن لینے والے ہیں۔ انہوں نے کہا کہ اسے روک دیں ہم ثالثی کرتے ہیں اور مصالحت کرواتے ہیں۔‘ انہوں نے کہا کہ ’اس رات کلین اپ آپریشن ہونے جا رہا تھا جس سے ان کو سبق آ جاتا لیکن وہ قطر کی درخواست پر رک گیا۔ لیکن قطر میں ہونے والے مذاکرات سے کچھ نہیں نکلا۔ پھر استنبول میں بھی مذاکرات سے کچھ نہ نکلا۔ طالبان کی رجیم میں آدھے صلح پسند ہیں اور آدھے چاہتے ہیں یہ سب چلتا رہے۔‘ اسحاق ڈار کا کہنا تھا کہ ’مسئلے کا حل ڈائیلاگ اور ڈپلومیسی میں ہے۔ ان کو اپنے گریبان میں جھانکنا ہوگا اور اپنی کمزوری کو دور کرنا ہوگا۔ اس کے بعد پاکستان تعاون میں ایک نہیں سو قدم آگے جائے گا۔‘

Source: social media