ممبئی کو ہرا کر پلے آف میں پہنچی راجستھان رائلز، پنجاب اور کولکاتہ کا خواب ہوا چکناچور

راجستھان رائلز نے کرو یا مرو میچ میں ممبئی انڈینز کو 30 رنز سے شکست دے کر آئی پی ایل 2026 کے پلے آف میں جگہ بنا لی۔ آئی پی ایل کے پلے آف میں پہنچنے والی راجستھان چوتھی اور آخری ٹیم بنی۔ اس سے پہلے رائل چیلنجرز بنگلورو، گجرات ٹائٹنز اور سن رائزرس حیدرآباد نے پلے آف میں اپنی جگہ پکی کرلی تھی۔ راجستھان نے 16 پوائنٹس لے کر پوائنٹ ٹیبل میں چوتھے نمبر پر رہتے ہوئے پلے آف کے لیے کوالیفائی کیا، جبکہ اس سے پہلے آر سی بی، جی ٹی اور ایس آر ایچ نے برابر 18-18 پوائنٹس لے کر پلے آف کا ٹکٹ حاصل کیا تھا۔ ایلیمینیٹر میں راجستھان کا مقابلہ سن رائزرس حیدرآباد سے ہوگا۔ راجستھان کی جانب سے دیے گئے 206 رنز کے ہدف کے تعاقب میں ممبئی انڈینز نے 9 وکٹوں پر 175 رنز بنائے۔ ان کی شروعات انتہائی خراب رہی۔ اسکور بورڈ پر ابھی ممبئی کا کھاتہ بھی نہیں کھلا تھا کہ پہلے اوور کی چوتھی گیند پر جوفرا آرچر نے روہت شرما کو دھروو جوریل کے ہاتھوں کیچ آؤٹ کروا کر ممبئی کو بڑا دھچکا دیا۔ روہت کھاتہ بھی نہ کھول سکے۔ اس کے بعد نمن دھیّر 6 رنز بنا کر پویلین لوٹ گئے۔ فارم میں موجود وکٹ کیپر ریان رکلٹن بھی کچھ خاص کارکردگی نہ دکھا سکے اور 12 رنز بنا کر آؤٹ ہوئے۔ ول جیکس 33 رنز بنا کر آؤٹ ہوئے۔ تلک ورما 3 رنز بنا کر آؤٹ ہوئے۔ اس کے بعد سوریہ کمار یادو اور کپتان ہاردک پانڈیا نے اننگز سنبھالی۔ پانڈیا 15 گیندوں پر 34 رنز بنا کر آؤٹ ہوئے، جبکہ سوریہ نے 42 گیندوں پر 60 رنز کی اننگز کھیلی۔ راجستھان کی جانب سے جوفرا آرچر نے سب سے زیادہ 3 وکٹیں حاصل کیں، جبکہ ناندری برگر اور برجیش شرما نے دو دو وکٹیں حاصل کیں۔ اس سے پہلے راجستھان رائلز نے مسلسل وقفوں پر وکٹیں گنوانے کے باوجود 8 وکٹوں پر 205 رنز بنائے۔ پہلے بیٹنگ کرتے ہوئے ٹیم مسلسل وقفے پر وکٹیں گنواتی رہی، لیکن دھروو جوریل نے 26 گیندوں پر 38، جوفرا آرچر نے 15 گیندوں پر 32، داسن شناکا نے 15 گیندوں پر 29 اور یشسوی جیسوال نے 17 گیندوں پر 27 رنز کا اہم کردار ادا کیا۔ ٹیم پوری اننگز کے دوران بڑی شراکتیں بنانے میں ناکام رہی، لیکن 200 رنز کا ہندسہ پار کرنے میں کامیاب رہی۔ رویندر جڈیجہ (ناٹ آؤٹ 19) اور ناندری برگر (ناٹ آؤٹ 10) نے آخری اوورز میں 13 گیندوں پر 30 رنز کی شراکت داری کر کے ٹیم کو مضبوط اسکور تک پہنچایا۔ وہیں ممبئی انڈینز کی جانب سے دیپک چاہر نے 43 اور شردل ٹھاکر نے 41 رنز دے کر دو دو وکٹیں حاصل کیں۔ ول جیکس، اللہ غضنفر اور کاربن بوش کو ایک ایک کامیابی ملی۔

Source: social media