مادھوری نے فلم انڈسٹری میں خواتین کے معاوضوں پر آواز اٹھادی

بالی ووڈ کی ماضی کی شہرت یافتہ اداکارہ مادھوری ڈکشٹ نے فلم انڈسٹری میں معاوضوں میں فرق کے حوالے سے گفتگو کرتے ہوئے کہا کہ خواتین اداکاروں کو بھی زیادہ معاوضہ ملنا چاہیے۔ انھوں نے فلمی صنعت میں معاوضے میں عدم مساوات کے مسئلے پر گفتگو کرتے ہوئے کہا کہ یہ چیلنج صرف سنیما تک محدود نہیں بلکہ مختلف پیشوں میں بھی ہے۔ انکا مزید کہنا تھا کہ منصفانہ معاوضے کے لیے جدوجہد جاری ہے اور مساوی تنخواہ کی لڑائی آج بھی تمام شعبوں میں ایک اہم مسئلہ ہے۔ 58 سالہ مادھوری ڈکشٹ نے بالی ووڈ سپر اسٹارز شاہ رخ خان، سلمان خان، عامر خان، انیل کپور اور سنجے دت کے ساتھ کئی فلموں میں کام کیا، ان سے پوچھا گیا کہ اپنے عروج کے دور میں کبھی مساوی معاوضے کے لیے آواز اٹھانے کی ضرورت پڑی تو انہوں نے کہا کہ عدم توازن ہر شعبے میں خواتین کے لیے ایک عالمی حقیقت ہے، چاہے وہ کسی بھی شعبے میں کام کرتی ہوں۔ انکا کہنا تھا کہ خواتین کارپوریٹ بزنس سمیت چاہے کہیں بھی کام کریں معاوضے میں مساوات ہونا ضروری ہے۔ یہ کوئی نیا مسئلہ نہیں، ہر کوئی اس کے لیے جدوجہد کر رہا ہے۔ انھوں نے کہا اگر مردوں سے زیادہ نہیں لیکن خواتین کو بھی زیادہ معاوضہ ملنا چاہیے تاکہ اس میں توازن قائم ہوسکے۔ ان کے بیانات حالیہ برسوں میں کئی معروف اداکاراؤں کی قیادت میں ہونے والے وسیع تر مباحثے کی عکاسی کرتے ہیں۔ ان اداکاراوں میں بھومی پڈنیکر، کرتی سنن، دیپیکا پڈوکون، پریانکا چوپڑا اور دیگر شامل ہیں، جنہوں نے اجرت کے فرق اور اسٹرکچرل عدم مساوات پر کھل کر گفتگو کی۔

Source: social media