امن کوششوں کے باوجود... روس کی جانب سے کئیف پر ڈرون اور میزائل حملے

یوکرینی ذمے داران کے مطابق روسی ڈرون طیاروں اور میزائلوں نے آج بروز ہفتہ صبح سویرے یوکرین کے دارالحکومت کئیف پر حملہ کیا، جس کے نتیجے میں ایک شخص ہلاک اور کئی افراد زخمی ہو گئے۔ شہر بھر میں دھماکوں کی آوازیں گونجتی رہیں اور تباہ شدہ ڈرونز کا ملبہ مختلف جگہوں پر گرتا رہا۔ کئیف کی فوجی انتظامیہ کے سربراہ تیمور تکاتشینکو نے تصدیق کی کہ چھ مختلف مقامات پر حملے ہوئے، جن سے رہائشی عمارتیں اور دیگر عمارتیں متاثر ہوئیں۔ شہر کی آبادی تقریباً 30 لاکھ ہے۔ انٹرنیٹ پر جاری وڈیو میں کم از کم ایک رہائشی عمارت کو آگ لگے ہوئے دکھایا گیا ہے جبکہ امدادی ٹیمیں متاثرہ عمارتوں کے آس پاس اور ملبے سے بھری گلیوں میں کام کرتی نظر آ رہی ہیں۔ تکاتشینکو نے کہا "دشمن کے ڈرون شہر کے اوپر پرواز کر رہے ہیں اور فضائی دفاع جواب دے رہا ہے۔ دارالحکومت کے آس پاس کئی مقامات کو نشانہ بنایا گیا ہے۔" انہوں نے اس حملے کی مذمت کرتے ہوئے کہا "یہ روسی کوشش صرف شہریوں کو خوف زدہ کرنے کی ایک حرکت ہے۔" کئیف کے میئر ویتالی کلیچکو نے بھی شہریوں کو ہدایت کی کہ حملے کے دوران پناہ گاہوں میں رہیں۔ ادھر روس کے وولگوگراد صوبے میں یوکرینی ڈرون حملے کے نتیجے میں دو افراد زخمی ہوئے، جبکہ ایک گودام اور متعدد رہائشی عمارتوں کو نقصان پہنچا۔ صوبائی حکام کے مطابق یہ معلومات گورنر آندرے بوچارو نے فراہم کیں۔ صوبائی حکومتی چینل کے "ٹیلیگرام" اکاؤنٹ کے مطابق بوچارو نے بتایا کہ "آج صبح روسی وزارتِ دفاع کے فضائی دفاعی نظام نے وولگوگراد کے شہری انفراسٹرکچر پر کیے گئے یوکرینی ڈرون حملے کو ناکام بنایا، مگر اس کے نتیجے میں دو افراد زخمی اور ایک گودام سمیت کئی عمارتیں متاثر ہوئیں۔" اس ہفتے کے شروع میں بھی کئیف پر روسی ڈرون اور میزائل حملہ ہوا تھا، جس میں سات افراد ہلاک اور کئی رہائشی عمارتوں میں آگ بھڑک اٹھی تھی۔ اسی دوران بلومبرگ نیوز نے جمعہ کو ایک با خبر ذریعے کے حوالے سے بتایا کہ ایک یوکرینی وفد امن منصوبے پر مزید بات چیت کے لیے امریکہ روانہ ہو چکا ہے۔ یہ منصوبہ امریکی صدر ڈونلڈ ٹرمپ نے پیش کیا تھا۔ بلومبرگ کے مطابق یوکرینی وفد میں سینئر سیکیورٹی اہل کار رستم اُمیرَوف اور پہلے نائب وزیرِ خارجہ سرگئی کیسلیٹْسیا شامل ہیں۔ ان کی ملاقات امریکی نمائندہ خصوصی اسٹیو وِٹکوف اور ٹرمپ کے داماد جیرڈ کُشنر سے فلوریڈا میں متوقع ہے۔ یوکرین کے صدر ولودی میر زیلنسکی نے اس سے پہلے کہا تھا کہ روس کے ساتھ جنگ ختم کرنے کے لیے ممکنہ تجاویز پر یوکرینی اور امریکی حکام کے درمیان بات چیت جلد ہونے والی ہے۔ اپنے خطاب میں زیلنسکی نے بتایا کہ ان مذاکرات میں یوکرین کی فوج، وزارتِ خارجہ اور انٹیلی جنس کے اعلیٰ حکام شامل ہوں گے، تاکہ اس جنگ کے خاتمے کے لیے عملی پیش رفت کی جا سکے، جو اپنے چوتھے سال میں داخل ہونے کے قریب ہے۔

Source: social media